Home Local Centro pa Hoben y Famia a ricibi bishita di Parlamentarionan

Centro pa Hoben y Famia a ricibi bishita di Parlamentarionan

SHARE

Oranjestad, Aruba – Centro pa Hoben y Famia ta un di e proyectonan di e Sociaal Crisisplan unda cu ta enfoca ariba e parti preventivo. E Centro pa Hoben y Famia ta un concepto unico unda cu instancianan ariba tereno preventivo a uni pa traha ariba un forma integral y asina brinda e comunidad di Aruba nan servicionan bou di un solo dak.

E meta di e Centro pa Hoben y Famia ta pa brinda informacion, guia y sosten na mayornan, famia, educadornan y profesionalnan ariba e tereno di lantamento di mucha. Banda di esaki nan ta ofrece programanan educativo pa nos muchanan y hobennan cu e meta pa stimula nan desaroyo social-emocional, traha ariba nan personalidad y habilidadnan di liderazgo.

Durante e apertura virtual di e centro a ricibi bishita di algun parlamentario caminda cada un a haya un amplio presentation y “rondleiding” pa asina conoce mas di cerca cada instancia cu ta forma parti di Centro pa Hoben y Famia. 

E instancianan cu ta formando parti di e Centro pa Hoben y Famia actualmente ta lo siguiente: Tienda di Educacion, Fundacion Respeta Mi, Fundacion pa Nos Muchanan, Stichting Wit Gele Kruis, Departamento Asuntonan Social, Fundacion Anti Droga Aruba, Stichting ADRA y Heart Centered Leadership Foundation.

Banda di e instancianan aki tin un plataforma di instancianan cu ta sostene e trabou preventivo y ta traha hopi di serca cu e instancianan den e Centro aki. Instancianan manera Telefon pa Hubentud, Korps Politie Aruba, Fundacion pa Nos Comunidad, Dienst Publieke scholen, Buro Sostenemi, Stichting Katholieke Scholen Aruba, Fundacion Famia Plania, Asociacion Trabou di Hubentud Aruba, Directie Voogdijraad, Stichting Protestants Onderwijs Aruba, Jeugdgezondheidszorg, Casa Cuna, Veiligheidshuis, Kinderhuis Imeldahof, Fundacion Guiami, Slachtofferhulp, Respaldo, Jeugd Zedenpolitie, etc.

Centro pa Hoben y Famia su plan pa 2021 ta pa hasi e centro mas conoci bou di nos comunidad. Ta enfoca pa traha un plan di campañja di conscientisacion, continua cu e trayecto pa mama hoben, continua cu e curso futuro mayor pa mayornan hoben, inicia e trayecto di guia pa tata/hende homber, ofrece mensualmente encuentro informativo pa mamanan dor di diferente instancianan, cuminsa cu e training di “sociale vaardigheid” pa muchanan y hobennan y start un grupo di hoben pa hoben. 

Centro pa Hoben y Famia ta invita e comunidad en general pa pasa bishita nan na Sabana Blanco 68 C of yama nan na 528-1200 y tambe follow nan FB page pa mas informacion di nan actividad y charlanan.