Home » Eleccion 2020 na Estados Unidos: Cuanto el a costa y ken a page?

Eleccion 2020 na Estados Unidos: Cuanto el a costa y ken a page?

by Admin
0 comment 65 views

E campaña electoral 2020 a kibra tur record, cu candidatonan presidencial y candidatonan pa congreso gastando un total di casi 14 biyon dollar, mas cu dos biaha e costo di 2016.
E aña aki e campaña mester a tene cuenta cu e pandemia di coronavirus, pero kiko ta splica e aumento drastico aki?
Como cu e campaña tradicional a wordo limita pa e restriccionnan di coronavirus, mas placa a wordo inverti den propaganda ariba media, manera entre otro television. Trump su campaña a hinca miyones den propaganda, entre otro un superbowl ad di 3 minuut. Ambos candidato a gasta mas di 200 miyon pa yega na votadornan ariba social media.Y banda di esey ta bin e salarionan pa e personal di campaña. Biden a gasta mas di 50 miyon dollar na salario pa cientos di empleado. Hopi mas cu e 20 miyon gasta door di Trump. Y no lubida e mercancia di propaganda ‘make America great again’ di Trump, cu a costa mas di 8 miyon dollar pa produci. Banda di esaki, candidatura pa congreso a costa un record di 7 biyon dollar.
Pero di unda tur e placa aki ta bin?
Mayoria ta bin di donacion. Na 2020 mas o menos 20% di tur e contribucionnan a bin di ciudadanonan Mericano cu a duna 200 dollar of menos. Un parti mas grandi, di casi 14 biyon dollar a bin di hendenan rico. Tin un limite di 2.800 dollar cu mag di wordo duna directamente na e campaña pues e mayoria di e donacionnan ta bin di otro forma. Campañadornan ta conoci pa tene cenanan grandi pa donadornan rico, durante cual nan sa recauda asta 10 miyon dollar na fondo den un solo anochi. Desde 2010 ta posibel tambe pa gruponan independiente haci fundraising cerca companianan y individuonan, pa financia actividadnan politico. E gruponan aki ta wordo yama Super PACS y nan no tin e permiso di coordina directamente cu e candidatonan. Contribucionnan di gruponan a redobla den 2020 compara cu 2016. Biden a ricibi mas cu Trump. Tin algun otro regla pa cu donacion. Por ehempel, solamente Mericano y residentenan permanente mag di haci donacion. Pero contrario na otro paisnan no tin limite pa locual ta trata e gastonan di campaña. Y campaña na Merca ta birando mas y mas costoso. E campaña di 2020 a costa 4 bes mas cu esun di aña 2000.
E trabou di mas poderoso di mundo no ta sali barata. Y e aña aki no tawata un excepcion.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio