Home Corte Mama y yiu cu tabatin negoshi di droga na cas dilanti Hues

Mama y yiu cu tabatin negoshi di droga na cas dilanti Hues

SHARE

 

ORANJESTAD – E dama J.K. y su yiu homber B.K. a presenta dilanti Hues pa e caso penal cu Ministerio Publico a cuminsa contra nan. Tratamento di e caso a sosode via video conference. Aruba Native por a compronde cu Fiscal a acusa e mama J.K. di posecion y bende cocaina y marihuana entre Juni 2018 y Juni 2020. Fiscal a acusa B.K. di tabata bende entre Juni 2019 y Juni 2020.

Ta asina cu J.K. a admiti di a bende droga pa algo mas cu 1 aña. Polis tabata observa y a mira movecion sospechoso na e cas. A detene hendenan cu a bay cumpra na e cas. Nan a bisa cu ta droga nan ta bay cumpra. Hues a bisa cu tin hendenan a declara cu nan ta cumprando pa 2 aña y tambe cu tin yiunan ta bende. Segun J.K., su yiunan ta biba eynan y hende ta kere cu su yiunan ta bende. El a desmenti esaki. Hues a bisa cu tin mas hende ta bisa cu e muchanan ta bende. J.K. a bisa cu ta e so ta bende.

Hues a bisa cu B.K. mes a bisa cu e sa yuda J.K. bende droga. Hues a puntra B.K. si el a yuda su mama bende. El a bisa Hues un of dos biaha el a yuda su mama pero e no ta bendedor di droga. Hues a bisa cu tin di e hendenan a mustra cu B.K. ta bende tambe.

Durante investigacion a haya den e cas y den e auto droga. En total a haya 172,7 gram di marihuana y 300 gram di cocaina.

Fiscal a bisa cu a keda legalmente proba cu mama y yiu tabata bende droga. Fiscal e menciona cu e ta mantene 1 aña y mey di bende pa e mama y e yiu homber 1 aña. Fiscal a tene cuenta cu e cantidad di droga cu a keda confisca. Fiscal a bisa cu droga ta causa problema den comunidad.  El a exigi 20 luna di prison pa J.K. y 9 luna di prison pa B.K. Fiscal a bisa cu e placa haya na e cas lo mester keda confisca.

Hues despues di a scucha defensa di abogado a sera tratamento di e caso y dicta sentencia di biaha. Hues a bisa cu e ta haya legalmente proba cu J.K. bende durante 1 aña y mey, cocaina y marihuana. Pa B.K. e ta 1 aña tabata bende. Hues a tene cuenta cu orientacion di Hof, pa cu bendemento di droga for di cas. Hues a bisa cu bendemento di droga ta causa hopi miseria y criminalidad.

El a condena J.K. na 20 luna di prison. Hues a bisa cu tur placa lo keda confisca. Hues a condena B.K. na 12 luna di prison di cual 6 luna ta condicional cu un tempo di prueba di 2 aña. Hues a ordena pa B.K. cay bou guia di Reclasering. Hues a bisa B.K. cu esaki ta un aviso bon cla.