Cas di Cultura ta lansa THE FILM SOCIETY, cuminsando na 2021. Inscripcion pa bira miembro ta awor na 2020. Anochi special pa splicacion y inscripcion ta diahuebs 19 di November desde 7pm na Cas di Cultura, cu presentacion di un pelicula sorpresa gratis cu ta cuminsa 7:30pm.
Na añanan 1950 Aruba a conoce e asociacion yama Film Liga, un club pa esnan interesa den pelicula diferente, international y artistico, apreciando e arte di cine y e pelicula no tipicamente “blockbuster”. Cas di Cultura awor ta trece un club similar numa cu nomber The Film Society, cu ta un miembrecia pa 14 aña bay ariba.
Ya pa sigur 125 aña caba pelicula ta forma parti di entretenimiento na mundo. Inventornan di Belgica, Austria, Merca y Francia a percura pa diferente componente di e proyector cu al final a resulta den prome screening comercial na Paris na 1895. Esaki, percura pa e rumannan Lumière cu nan proyector yama ‘cinematographe’. Di eynan cine a desaroya den un industria biyonario, cu ta encera un scala di disciplina pa crea un solo producto. Aparte di fantasia infinito, cine ta visualisa bida real y ta forma e spiel di comunidad.
Na 2021 tin planea pa presenta 12 pelicula, un cada luna, den diferente genero y di diferente pais, semper acompaña pa un introduccion cortico, di sea un experto di e genero of di e topico di e pelicula di luna. Despues di cada presentacion tin espacio pa intercambio di opinion y idea.
Bo ta amante di bon pelicula y e arte di cine, no keda afor ya cu e miembrecia ta limita. Sigui Cas di Cultura su Facebook page pa mas informacion. “Let’s Watch & Talk!”