dialuna 16 di november 2020, Gobierno di Aruba a publica e masterplan dinamico cu e titulo ‘Reposicionando e Rumbo di nos Pais’. Manera indica den comunicacionnan anterior e masterplan a wordo traha danki na e esfuerso incansabel di mas di 125 profesional di sector publico como tambe sector priva, cu durante mas di 175 sesion a duna nan conocemento y experticio pa asina crea un plan pa un futuro resiliente pa Aruba.
Manera indica anteriormente, 5 proyecto acelerador a wordo identifica cu ta cualifica pa drenta nan etapa di implementacion. Un ehempel di esaki ta e introduccion recien di e Alivio Fiscal II pa duna nos comercio y empresarionan un alivio y empuhe. Mas ainda e ekipo di reforma fiscal ta trahando y preparando e reforma pa asina sigui cu e pasonan necesario pa logra esaki e añanan nos dilanti.
Relaciona cu e reforma di Ley Laboral, por indica cu e proceso di tripartite ta andando unda cu diferente tema di revision y modernisacion di nos leynan ta wordo trata. E ekipo di implementacion ta trahando riba un database cu ta bay duna un miho bista di nos mercado laboral pa asina por engrandece alineamento entre empleado y dunado di trabou.
E trayectonan di red-tape y innovacion den legislacion tambe ta andando unda cu un enfoke special riba revision di ordenansa di permiso pa haci esaki mas eficiente y asina acelera desaroyo economico sostenibel. Adicionalmente, ta trahando un mapa completo di e proceso legislativo pa asina indentifica puntonan cu por agilisa y reforsa dicho proceso.
Pa locual ta trayecto di e-Government por indica cu trabounan prepratorio pa por implementa e sistema (interoperability platform) pa por intercambia datos den gobierno y facilita experencia di e ciudadano como tambe reforsa un forma di traha transparante, ta den su etapa final.
Tambe por indica cu e proyectonan acelerador ta estrechamente alinea cu e National Strategic Plan (NSP), unda cu e diferente grupo di trabou corespondiente a haci palabracionnan clave pa asina coordina esfuersonan pa logra e metanan di Nacionnan Uni, e asina yama Sustainable Development Goals.
Importante pa indica ta cu e version publica ta contene algun comentario, proposicion y critica constructivo ricibi di diferente actor activo riba diferente sector. Asina e grupo encarga cu revision y amplificacion di e plan a traha cu dedicacion pa por a registra tur comentario y proposicion y asina amplia e plan debidamente.
Adicionalmente por indica cu ampliacion di e masterplan tambe e tuma luga pa medio di analisis y comparacion di e temanan presenta den e draft ‘Landspakket’ door di Gobierno Hulandes, pa asina promove coherencia y alineamento. No obstante cu e temanan den e masterplan ta wordo trata den forma mas amplio y integral compara cu den e ‘Landspakket’, e metanan principal ta alinea y lo sigui alinea e accionnan den mas detaye hunto cu e ekiponan di implementacion.
Esaki ta apenas e prome etapa di ampliacion ya cu e masterplan lo keda evoluciona a base di consulta cu lo tuma luga cu partner di e diferente sector (e.o. sector priva). Sinembargo Gobierno di Aruba, pendiente di e siguiente etapa, ta comparti e plan cu comunidad di Aruba pa asina reforsa e proceso di inclusion. E plan ta obtenibel den forma innovativo y digital pa tur esnan interesa na:
http://www.repositioningoursails.com.
Comunidad completo ta wordo invita pa consulta e masterplan ‘Reposicionando e Rumbo di nos Pais’.
