14 di november ta dia mundial di diabetes y parlamentario Dellanire Maduro ta indica cu fuera cu e ta un fecha pa concientisa y educa riba e problematica di diabetes, e kier gradici e grupo di enfermeronan cu ta traha specificamente dia aden, dia afo cu e grupo di pashentnan diabetico. Ta trata aki di e enfermeronan cu ta cay bou Wit Gele Kruis, e POH (Praktijk Ondersteuner Huisartsen), e enfermeronan na IMSAN Centro diabetico y e enfermeronan diabetico di hospital cu ta traha cu internistanan. Dellanire ta manda palabranan di danki pa nan input y esfuerso, pa brinda ayudo, sosten, comprension y pa duna e pashenan e hermentnan y conocemento pa con pa anda y biba cu diabetes.
Ta trata aki di un enfermedad di cual alrededor di 463.000.000 persona na mundo ta padece y ta premira cu pa 2045 lo yega 700.000.000. Nos hendenan mester wordo concientisa riba dje, specialmente con pa preveni esaki, mirando cu e ta un padecimento unda mas di 50% ta prevenibel, cu por ataca diferente organo y cu por tin consecuencianan hopi grave.
Dellanire Maduro ta bisa cu informacion di Wit Gele Kruis ta mustra cu cifranan di AZV ta bisa cu 8.2% di aseguradonan ta uza remedi pa diabetes, cual ta riba 8.000 persona. Mester remarca cu pa cada pashent diagnostica tin un eyfo cu no sa cu e tin diabetes. Cu otro palabra e porcentahe di e cantidad di persona cu diabetes ta dobel.
COVID-19 a trece diferente reto pa nos dunandonan di cuido pero tambe pa pashentnan cu diabetes cual ta un grupo di riesgo. Pashentnan a haya nan mes cu miedo pa contrae esaki, perdida di trabou, tension na cas, cu ta hiba na preocupacion, stress, dificultad pa por drumi, unda no solamente nan diabetes ta desregula pero tambe ta afecta e salud mental.
E situacion aki a pone mas enfasis riba e rol di e enfermeronan aki ,riba e parti di concientisacion, educacion, guia y sosten. Tambe riba e importancia di por ehempel pa cada dokter di cas por tin un POH na su servicio, pa Aruba por conta cu un enfermero especialisa pa mucha cu diabetes tipo 1.
Dellanire ta mustra riba e importancia di e ramo di enfermeria pa loke ta trata diferente enfermedadnan, pero tambe e escases di enfermeronan cu tin mundialmente, unda ta ser papia cu tin mester di 6 miyon enfermero adicional, esaki no ta diferente na Aruba tampoco. Pesey e ta considera necesario pa sigui stimula pa nos hendenan tambe por sigui e estudio importante aki. Asina nan tambe por yuda y contribui na duna e cuido, guia y educacion adecua na nos comunidad.
Finalisando, Dellanire Maduro a comenta cu tin partinan di mundo unda hendenan no tin acceso na tratamento adecua, no por conta cu enfermeronan cu por duna e guia y informacion. Contrario na esaki, Aruba ta conta cu un grupo di profesionalnan caba y ta necesario pa e grupo aki sigui crece den e direccion aki pa duna un miho calidad di cuido riba e tereno di diabetes.
Di e forma aki lo por preveni cu e grupo aki lo bira mas grandi. Scolnan saludabel mester sigui crece y e educacion na scol riba diabetes mester wordo inclui. “Education is the most powerful weapon which you can use to change the world” Nelson Mandala. Entre mas educa nos comunidad ta, lo tin un miho calidad di bida y tambe menos gasto medico. “Un estilo di bida saludabel por preveni diabetes tipo 2 y diagnostico trempan cu cuido apropia por evita of retrasa complicacionnan”.
