Hopi biaha ta bin problema ora cu un familiar wordo encarga cu e reparticion di herencia

Ora cu un di mayornan fayece hopi bes un yiu ta wordo nombra como ehecutor. Esaki hopi bes ta causa pleito y den e casonan mas pio asta ta ocaciona batayanan legal.
Esaki a resulta for di investigacion cu e asociacionnan vFAS, VMN y EPN a realisa cerca notarionan y abogadonan specializa den herencia. Diabierna 13 ta oficialmente e Dia Di Herencia. E profesionalnan aki kier haci uzo di e oportunidad pa enfatisa e importancia di busca ayudo profesional ora ta trata di reparticion di herencia.
Locual hopi bes ta bai fout, ta cu ora un di e yiunan wordo encarga cu e trabou aki, e no tin ningun experiencia cu e rol di ehecutor. Tambe hopi bes e comunicacion ta malo of no-existente. Esaki atrobe ta causa irritacion y desconfianza cerca e otro herederonan.
Door cu un fayecimento ariba su mes ta algo emocional caba pa esnan evolvi, e reparticion por causa pleito y den e pio caso asta casonan legal, segun e notarionan y abogadonan.
Notarionan ta conseha herederonan pa pensa bon ariba nan escohencia di un ehecutor di testament. Ora un ehecutor no ta un persona hopi cercano na e famia, esaki lo causa menos discusion y problema. Si ta trata di un ehecutor profesional, e chance ta mas chikito ainda.
Den mas o menos 60% di casonan, un di e yiunan ta wordo apunta como ehecutor di e herencia. Den 25% di e casonan, ningun hende ta wordo nombra specificamente.
Casi mitar di e hendenan no sa kiko e funcion di un ehecutor ta encera. 4 di cada 10 persona no sa cu bo por pidi un pago pa e trabou aki. Locual si mas o menos mitar di tur hende sa, ta cu e funcion aki por wordo nenga.