ORANJESTAD – Awe mainta sentencia a cay den e caso penal cu Minsterio Publico a cuminsa contra e homber di Peru biba na Aruba, A. Aruba Native por a compronde cu Hues a confirma e exigencia di Fiscal cu ta 12 luna di prison di cual 6 luna ta condicional.
Tratamento di e caso aki a sosode luna pasa via video conference caminda Fiscal a acusa A. di a mishi cu un mucha na su paña na su parti intimo y tambe di a penetra e mucha. A. a admiti di a mishi cu e mucha bou di 12 aña pero na su paña y cu esaki a sosode dos biaha so.
Fiscal a bisa cu no tin prueba suficiente pa e acusacion di mishi na parti intimo. Fiscal ta haya prueba cu A. a pasa man pero riba panja di e mucha na su partinan intimo. Tambe cu a caricia full e mucha su curpa. Na opinion di Fiscal, aunke cu e mucha ta bisa cu A. lo a hinca un dede den su parti intimo, Fiscal ta haya cu no tin suficiente prueba pa esaki. Fiscal a exigi 12 luna di prison di cual 6 luna ta condicional cu 2 aña di prueba y bou guia di Reclasering. Esaki ta encera cu mester sigui tur indicacion di Reclasering. Tambe Fiscal a pidi Hues pa prohibi A. drenta den contacto cu mama y e yiu pasobra nan ta bisiña. Fiscal ta haya cu e mama ta hopi razonabel cu e demanda pasobra no a pone e parti inmaterial. Fiscal ta kere cu e otro ruman muher di e mucha tambe a keda afecta. El a pidi Hues pa confirma e demanda di 16 mil florin.
Awe mainta Hues a bisa cu mescos cu Fiscal, e no ta haya proba cu A. a hinca dede den e parti intimo di e mucha. Hues ta declara A. liber di e hecho ey.
Hues a bisa cu e ta tene cuenta cu no tabatin penetracion y cu.A. a accepta su responsabilidad. Hues tambe a tene cuenta cu castigo cu Hof ta duna den casonan similar. Hues a bisa cu e ta confirma e exigencia di Fiscal y ta condena A. na 12 luna di prison di cual 6 luna ta condicional cu un tempo di prueba di 2 aña. Tambe Hues a bisa cu A. mester cay bao guia di Reclasering.
Pa loke ta e demanda di daño pa cu tratamento di e mucha, Hues a rechaza esaki. Hues a bisa cu no tin specificacion di psycologo kico el a constata. E psycologo solamente a calcula un cierto cantidad di tratamento. Hues a sigui bisa cu e mama den e demanda di daño a inclui e otro yiu mas jong y tambe su mes. Hues a remarca cu e caso penal ta contra A. pa a mishi cu e yiu muher grandi. No tin acusacion contra A. pa e yiu chikito. No por bay inclui esaki den e demanda di daño. Hues a sigui bisa cu e mama mes no por haci demanda pa su mes, sino pa e mucha so. Hues a bisa cu e ta declara e demanda no admisibel y asina ta keda e posibilidad cu e mama por cuminsa un caso civil caminda den Corte lo bay mas detaya riba kico ta e gastonan.
Hues tambe a prohibi A. pa ora e sali for di KIA, tin contacto cu e mucha y e mama.