Asesinato di reportero ta aumenta e incidencia di violencia contra reporteronan Mexicano

Dialuna mainta tempran, Israel Vázquez, un reportero di crimen na e ciudad Mexicano di Salamanca, a ricibi un tip cu un saco yen di restonan mortal humano a wordo benta banda di caminda.
El a yega na e escena prome cu polis, pero mientras e tawata preparando pa bai live ariba Facebook, algun homber a pasa den auto y a los 8 tiro ariba su persona. Ela fayece mas laat durante dia, a consecuencia di e heridanan di bala ricibi.
Israel Vázquez a bira e di tres reportero cu a wordo asesina den 2 siman di tempo y e di 8 pa e aña aki.
Jesús Alfonso Piñuelas, fundador di 2 agencia di noticia na e estado di Sonora, a wordo tira mata dia 2 di november ultimo. Arturo Alba Medina, un reportero di television na Ciudad Juárez a wordo tira mata dia 29 di oktober mientras e tawata coriendo door di ciudad. Informe di prensa ta bisa cu ela wordo alcanza pa 10 bala.
E cantidad di asesinatonan aki a pone cu actualmente Mexico ta cataloga como un di e lugarnan mas peligroso na mundo pa reporteronan, principalmente esnan cu ta cubri sucesonan cu tin di haber cu crimen, politica y seguridad.
Na Mexico, ya pa añas tin un crisis di violencia cu ta keda impune. Mientras gobiernonan Mexicano no ta tuma e responsabilidad pa haci un intento serio pa combati esaki, e situacion ta empeora cada bes mas.