Home » ARUBA TA BIRA E PROME DESTINACION PA CUAL JETBLUE TA OFRECE TEST PROME CU BIAHE A.T.A. SUMAMENTE SATISFECHO CU E LOGRO AKI!

ARUBA TA BIRA E PROME DESTINACION PA CUAL JETBLUE TA OFRECE TEST PROME CU BIAHE A.T.A. SUMAMENTE SATISFECHO CU E LOGRO AKI!

by Admin
0 comment 56 views

 

 

ORANJESTAD – Awe diaranson, Aruba Tourism Authority (A.T.A.) hunto cu e aerolinea JetBlue y The Vault (US Laboratory) a anuncia cu lo ofrece esnan biahando cu Jetblue riba e ruta di Merca pa Aruba cu nan por haci nan COVID-19 test prome cu nan yega nos destinacion. E testnan lo wordo conduci door di The Vault.

 

Desde september 2006, JetBlue a bira un partner importante y strategico pa crecemento di Aruba su turismo cu 4 diferente gateways for di Merca pa Aruba unda nos isla ta un di e destinacionnan clave pa cu nan servicio di Mint. Durante 2019, jetBlue a trece un total di 254.635 pasahero pa nos destinacion, cu ta 22.8% di tur bishitantenan pa Aruba. Cu esey nan ta e aerolinea cu ta transporta mas hopi turista pa nos isla. Entre juli pa october 2020, jetBlue a trece un total di 16.850 pasahero pa Aruba cu ta 25.1% di e total di e marketshare di e lunanan menciona.

Pronto jetBlue lo aumenta nan vuelonan pa nos isla.

 

Manera ta conoci, Aruba a bolbe habri su fronteranan parcialmente na juli 2020 pero cu restriccion pa e biaheronan prome cu nan yega Aruba. Sinembargo, e casonan positivo di COVID-19 na nos isla ta bahando y cu esaki e restriccionan pa e bishitantenan pa nos destinacion poco poco ta wordo ahusta.

 

Pa stimula e turistanan pa scoge nos destinacion como nan luga preferi pa pasa nan vacacion, desde prome di november e seguro obligatorio (Aruba Visitors Insurance) por ehempel a wordo reduci y awo ta pa cada estadia US$ 30.- pa persona y US$ 10.- pa tur mucha te cu 14 aña di edad. Tambe Aruba a elimina e lista di hotzones na Merca, unda tawatin mas restriccion pa e bishitante prome cu nan yega Aruba. Ademas di esaki, dia 1 di december Aruba lo habri su frontera pa e mercado di Latino America –cu excepcion di Venezuela- y tambe lo yama bonbini na biaheronan for di Mexico, Republica Dominicana y Haiti.

 

Un di e obstaculonan mas grandi pa e bishitantenan yega Aruba ta e test cu nan mester tuma y di cual nan mester upload e resultado negativo dentro di 72 ora prome cu nan yega Aruba. Nan tin opcion pa haci e test na Aruba tambe, pero gran mayoria ta opta y haci esfuerso pa haci esaki prome cu e biahe. Pa facilita e proceso aki aun mas, awo Jetblue ta ofrece su biaheronan riba e ruta di Merca pa Aruba pa haci nan COVID test prome cu nan yega nos destinacion. Esaki sigur lo yuda pa e bishitantenan yega Aruba mas facil. Jetblue ta lansa e programa aki cu Aruba como socio! Pues Aruba ta e prome destino pa cual Jetblue ta ofrece esaki. 

 

Tur e esfuerso aki entre otro naturalmente lo yuda Aruba su economia bolbe florece. Aruba Tourism Authority kier a gradici AAA y DVG pa nan cooperacion y nan asistencia pa realiza e pasonan importante aki.

 

Mescos cu otro destinacionnan, nos isla ta pasando den momentonan di reto pa loke ta trata e pandemia aki. P’esey ta importante pa nos tur sigui e protocolnan manera stipula door di diferente instancianan manera den luganan publico mester sigui bisti mondkapje y mantene e distancia di 1.5 meter di otro. No mas cu 4 persona den un grupo y laba man frecuente cu habon of uza handsanitizer.

 

Hunto nos lo vence y nos isla y su turismo lo sigui florece!

-FIN-

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio