WILMINGTON, Del. – Presidente electo Joe Biden y su team ta considerando pasonan legal contra un agencia federal cu ta tardando pa reconoce e victoria di e democrata ariba Presidente Donald Trump den e eleccion di siman pasa.
General Services Administration (GSA) normalmente ta reconoce un candidato presidencial ora bira evidente kende a gana un eleccion, pa e transicion di poder por cuminsa.
Esaki ainda no a pasa a pesar cu television y prensa Mericano a declara Biden como ganador diasabra pasa despues cu el a logra obtene suficiente voto electoral pa sigura e presidencia.
Ley no ta specifica claramente na ki momento GSA mester actua, pero oficialnan di transicion di Biden ta bisa cu e victoria ta evidente y un tardansa no ta hustifica, asta si Trump nenga di accepta su derota.
Trump repetidamente a bisa, sin ningun evidencia, cu tawata tin fraude den votacion y el a cuminsa un cantidad di procedura legal pa contraresta e resultado.
Oficialnan electoral a bisa cu no ta existi ningun evidencia di fraude significante, y expertonan legal ta bisa cu Trump su esfuerso tin masha poco chance di ta exitoso.
E administradora di GSA, Emily Murphy, kende a wordo nomina como tal door di Trump na 2017, ainda no a determina un ganador definitivo, segun un vocero. Un fuente cercano na Murphy a bisa cu e ta un profesional cu lo tuma su tempo pa yega na un decision.
Un oficial di transicion di Biden a bisa reporteronan cu a bira tempo pa GSA duna di conoce locual ta evidente, pues cu ta reconoce e presidente electo, y el a bisa cu e team di transicion lo considera pasonan legal den caso cu esaki no wordo haci.
“Accion legal sigur ta un posibilidad, pero tin otro opcionnan tambe cu nos ta considerando,” e oficial a bisa, nengando di sigui elabora tocante e otro opcionnan.
E tardansa ta costando Biden su team acceso na to miyones di dollars di fondo federal y e abilidad di reuni cu oficialnan y agencianan di inteligencia y otro departamentonan.
E transicion mester wordo reconoci pa por tin acceso na fondonan pa paga salarionan, pa paga consultants y biahe y tambe pa haya acceso na informacion, segun e oficial.
