Varios morto despues cu e resto di horcan Eta a causa inundacion den varios region na Centro-America

TEGUCIGALPA/GUATEMALA CITY (Reuters) – Locual a resta di horcan Eta a causa awacero torrencial y inundacionnan catastrofico den varios region na Centro-America, cu un cantidad di morto cu a aumenta drasticamente diahuebs a consecuencia di avalanchanan di lodo, mientras cu cayanan a bira riu y brugnan a cai.
Mas di 70 hende a muri, mas tanto den e regionnan di paisnan pober entre Mexico and Colombia, y cientos di hende a busca refugio ariba daknan di regionnan inunda.
Na Guatemala, e cantidad di morto a surpasa 50 den curso di diahuebs, segun Presidente Alejandro Giammattei, kende a bisa cu den algun area, avalanchanan di lodo a destrui docenas di cas.
“Awor nos ta purbando di yega eynan na pia, pasobra no tin otro manera,” Giammattei a bisa, refiriendo na e camindanan inunda cu ta complicanto esfuersonan di rescate.
Eta ta un di e tormentanan di mas fuerte cu a cu a afecta Centro-America, subiendo tera na Nicaragua como horcan categoria 4 diamars ultimo, cu bientonan di 241 kilometer pa ora, prome cu el a debilita pa un depresion tropical mientras cu el a drenta na e pais bisiña Honduras.
Na Honduras 8 morto a wordo confirma, mientras cu 5,000 hende a refugia nan mes den shelter y 63 comunidad ta incomunicabel, segun gobierno. Oficialnan ta bisa cu 20 brug a wordo destrui.
500 hende a wordo rescata for di ariba daknan diahuebs mientras e nivel di awa tawata sigui subi.
“Nos no lo stop te ora nos a rescata e ultimo persona,” Presidente Juan Orlando Hernandez a bisa media, agregando cu esfuersonan di rescate di polis, soldatnan y bomberonan lo sigui.
Daño y destruccion a afecta mayoria parti di Honduras y speedboat y helicopter lo wordo manda pa saca hende for di e areanan inaccessibel, Hernandez a bisa mas tempran durante dia.
Na Costa Rica, un avalancha di lodo a mata dos persona den un cas, mientras cu cinco persona, incluyendo 3 mucha, a muri den inundacion na e provincia di Chiriqui na Panama, cerca di e frontera cu Costa Rica, autoridadnan a bisa.
Tawata tin un lus di speranza na Honduras, na unda 60 piscado cu a desaparece ariba lama diamars a regresa despues di a busca refugio ariba algun rif, te ora nan a wordo rescata. Lider di comunidad, Robin Morales ta yama esaki un milager y ta bisa cu asta un di e hombernan di kende a wordo asumi cu el a muri di un ataka di curason, a regresa na bida.
Eta ta sigui su curso, moviendo noord-west over di Honduras y Belize den direccion di lama Caribe, cu un velocidad di 13 kilometer pa ora, segun reporte di National Hurricane Center (NHC). Awasero pisa ta sigui y e bientonan di e tormenta ta yega na nivel di 56 kilometer pa ora.
E pronostico ta mustra cu una bes cu e subi lama e lo recupera forsa y lo converti atrobe den un tormenta tropical, posibelmente afectando Cayman Islands, Cuba y e parti zuid di Florida durante e siguiente dianan, segun NHC.
Fuente: Reuters