Trump a subi escenario y ataca e eleccion, sin ningun base

WASHINGTON (AP) — Pa 40 ora, Presidente Donald Trump tawata zundra y expresa su malcontento den hoofdletter ariba social media.
Ultimo biaha cu el a aparece tawata ariba escenario na White House caminda el a expone un cantidad di declaracionnan falso tocante e eleccion den un intento pa pone den duda e integridad di e proceso democratico.
Mientras e votonan ainda ta den proceso di conteo, y e democrata Joe Biden ta aproximando victoria, Trump a expresa su mes di tal manera cu ta parce cu e ta consciente cu su oportunidad pa un segundo termino ta menguando.
“Si bo conta e votonan legal, mi ta gana facil. Si bo conta e votona ilegal, nan por purba horta e eleccion for di nos,” Trump a bisa.
No tin ningun evidencia cu ta mustra ariba ilegalidad di voto of ariba un proceso inhusto of corupto.
Trump a duna su declaracion den presencia di reporteronan na White House y a bai sin contesta pregunta. Esaki a bin despues cu Trump y su aliadonan a pasa un segundo dia pendiente y wardando hunto cu e resto di e pais, mientras cu e cantidad di voto tawata faborece Biden mas y mas den algun estado crucial.
Mientras cu Biden tin un bentaha ariba Trump, e presidente ainda tin un chance pa yega e 270 votonan electoral cu e mester pa gana reeleccion. The Associated Press ainda no a declara un ganador, y lo por tuma varios dia mas, pa e conteo di voto wordo conclui, cu un ganador absoluto como resultado.
Manera tawata di spera, varios di e votonan cu ta den proceso di conteo, ta votonan den mayoria democrata, cu a wordo manda via post, pa cual motibo ta dura mas largo pa procesa nan.
Votadornan di Trump tawata spera di vota en persona, despues cu e presidente mes a pasa lunas poniendo den duda e votacion via post.
Trump su preocupacion pa cu e resultado di eleccion tawata evidente den forma di tweets durante dia.
“STOP E CONTEO!” el a proclama. Pero e presidente no tin autoridad den conteo di voto y si a stop e conteo na e momento ey, esey lo a resulta den un victoria pa Biden.
“CUALKIER VOTO CU A DRENTA DESPUES DI DIA DI ELECCION NO MAG DI CONTA!” el a skirbi despues. Esey ta un sugerencia pa benta afo tur e votonan legal, tambe esunnan di miembronan cu ta staciona den teritorionan ultramar. Varios estado ta acepta votonan cu drenta despues di dia di eleccion, tanten cu nan a wordo poni ariba post mas tarda dia 3 di november.
Fuente: The Associated Press