ORANJESTAD – Diahuebs anochi, Partido di Pueblo Arubano (AVP) a tene e di tres sesion di brainstorming den e serie ‘Scucha, Pensa, Recupera Mihor’. Despues di a sinta cu sector di cuido medico riba virus di COVID-19, a toca e parti di turismo. Como e sector economico mas grandi di nos pais, tabata imposibel pa sinta cu tur stakeholders, sin tene cuenta cu e medidanan di precaucion estableci. Pa tal motibo a tene un di dos parti riba turismo.
Despues cu lider di AVP mr. Mike Eman a hiba palabra di apertura y bon bini, James Heppel, managing director di tourism analytics tabata encarga pa pone e situacion actual di turismo, mescos cu e proyeccionnan pa futuro, den perspectiva. Esaki ta sirbi como punto di salida pa tur hende sa con turismo ta desempenando actualmente y kico por bay spera pa 2021.
Aruba Timeshare Association (ATSA) Jurgen van Schayk y Sulaika Kelly, mescos cu Alex Nieuwmeyer, Gerente General grupo di hotelnan Divi na nos isla, a trece e puntonan cu ta preocupa nan for di angulo comercial. Ta trata aki p.e. e mercadeo di Aruba como destinacion, e mantencion di calidad di producto Aruba, pero tambe e flexibilisacion di leynan laboral pa por sobrevivi e crisis economico y e nivel abou di ocupacion cu ta pronostica di ta na 45%. Van Schayk a admiti cu pa e sector di timeshare, diferente cu hotel, ta un poco miho pasobra e propietarionan di timeshare tin un lealtad fuerte cu nos isla.
Hubert Dirks, Federacion di Trahadornan di Aruba (FTA) 80% ta den sector hotelero. E sindicalista no ta wak un relacion entre e peticion di sector horeca pa flexibilisa e leynan laboral, cu e situacion ocasiona pa COVID-19. Nan ta consciente cu e impacto ta grandi y e importancia di subsidionan den esaki, pa cual nan ta contento. Di mes manera ta papia cu trahadornan pa nan tambe coopera y compronde pa sali di e crisis.
Papiando pa A1 Taxi Services, Ernie de Mey un di su prome puntonan tabata cu lamentablemente e companianan di taxi no ta comunica debidamente riga e decision y/of maneho cu entidadnan nacional manera Crisis Team, DVG of ATA ta tuma. Su colega Rodison Oseana a papia di competencia inhusto manera Bicicleta y step, y mescos cu de Mey, a indica cu na aeropuerto, taxistanan no ta ser notifica ora cu un turista haci test y mester bay den cuarantena y tin biaha e turista ta pidi pa bay supermarket, p.e. ehempel.
Taxi Address Services (TAS), Franklin Krozendijk a trece diferente punto dilanti manera, introduccion di aplicacion digital pa solicita taxi. Danki Dios cu nos ta akinan,” asina representante di Professional Taxi Services, Ronny Gomez a bisa prome cu tur cos. El a comparti comentario di turistanan cu ta lamenta cu no tin un nightclub mas.
Den transcurso di proximo simannan, AVP lo continua cu e sesionnann aki tocando otro aspectonan di comunidad manera educacion, justicia, etc. Lider di e Partido ta masha gradici pa e contribucion di tur e participantenan y tambe na esnan cu ta percura pa e encuentronan aki ta un exito.