Home International Mundo ta warda impacientemente ariba resultado di eleccion na Estados Unidos

Mundo ta warda impacientemente ariba resultado di eleccion na Estados Unidos

SHARE

Mundo a realisa diaranson, cu e ganador di eleccion na Estados Unidos no lo ta conoci pa dias of kizas pa mas largo.
Lidernan di gobierno tawata lucha cu e tardansa y hendenan tawata intercambia opinion, speranza y miedo ariba nan feed y celular. Algun tawata remarca cu pa di tanto bes e presidencia Estado Unidense no lo wordo determina pa e cantidad total di voto, pero door di e 270 voto di Electoral College.
Ariba television na Hapon, a uza bolanan di candela pa denota e estadonan crucial pa cu e resultado. “Mi a tende cu lo dura algun tempo ainda prome cu tur cos ta cla,” minister di finanzas Hapones Taro Aso a bisa. “Mi no tin ningun idea con esaki lo por afecta nos.”
E falta di un ganador inmediato ariba su mes no ta un indicacion cu algo ta robes. Den un aña domina pa e pandemia di coronavirus, varios estado a haci e proceso mas facil pa vota via post. Esaki a disminui e rapides di compilacion di e resultadonan.
Lider opositor Ruso Alexei Navalny, kende a wordo ataca pa desafia Kremlin y purba haci Rusia mas democratico, a asta sugeri cu e tardansa ta reconfortante, un señal cu democracia ta haciendo su trabou.
Prome minister Australiano Scott Morrison, tambe a describi e tardansa como un demostracion di democracia.
Pero otro camindanan na mundo, e hecho di no sa kiko lo bai pasa, combina cu preocupacion pa con Merca lo bai recupera despues di e campaña di division, a causa inquietud. Trump su mesun declaracionnan di victoria extraordinario y prematuro y su amenaza pa hiba e eleccion te na Corte Supremo, tambe ta causa cierto ansiedad.
“Trump, of nos ta kima e pais” segun Danny Makki, analista di Syria, kende a haci comparacion cu e slogan “Assad, of nos ta kima e pais,” cu tawata wordo poni door di sostenedornan di Presidente di Syria, Bashar Assad ariba murayanan durante añanan di e guera civil.
For di Europa en particular, a bin un peticion pa pasenshi y conteo rigoroso.
Na Slovenia, e pais natal di first lady Melania Trump, prome minister Janez Jansa, a bisa cu ta bastante cla cu e poblacion Americano a elegi Donald Trump, pero e tawata un vos solitario entre e lidernan, cu a saca su propio conclusion.
Olaf Scholz, vice cansiyer Aleman, a insisti ariba un conteo completo, bisando: “Ta importante pa nos, cu tur cos wordo conta y cu tin un resultado transparente.”
Minister di defensa Aleman, Annegret Kramp-Karrenbauer, a bisa cu “e bataya tocante legitimidad di e resultado — kiko cu e por ta — a cuminsa awor.” “Esaki ta un situacion hopi explosivo. Un situacion, segun expertonan, cu por resulta den un crisis constitucional na Estados Unidos. Esaki ta algo cu sigur ta hopi preocupante.”