ORANJESTAD – Corte di Husticia a trata e caso penal cu Ministerio Publico a cuminsa contra e hombernan C.H., M.H. y J.H. Aruba Native por a compronde cu e trio aki ta envolvi den e caso di hortamento di un Glock cu 17 bala for di un auto di Polis. A bay haci investigacion na cas di e homber C.H. caminda no a haya e arma pero si a bin haya un arma automatico, silencer y 3 peña.Tratamento di e caso a sosode via video conference caminda e acusadonan tabata den un oficina na KIA y den sala di Corte tabata Hues, Fiscal y e abogadonan. E acusacion cu Fiscal a presenta den Corte contra e trio aki ta cu nan tabata den posecion di un arma di candela riba 5 Juni 2020, cual ta e Glock di Polis cu M.H. a horta. Fiscal ta acusa M.H. di ladronicia di un arma di candela di Polis. M.H. tambe ta wordo acusa di viola e toque de queda. E ruman C.H., ta wordo acusa di posecion di un metrayador y tambe cu e tabatin un cantidad di balanan cayente.
Hues a mustra cu for di e investigacion cu Polis a haci ta sali na cla cu dia 5 Juni 2020 M.H. a horta for di un auto di Polis, un Glock. Ta asina cu riba video di seguridad den vecindario unda e auto di Polis tabata staciona, a mira bon cla cu ta M.H. a drenta den e auto y a bay cu e arma.
Relaciona cu esaki a detene M.H. y for di interogacion a compronde cu e arma lo mester ta na cas di e ruman cu M.H., esta C.H.
Durante investigacion den e cas a bin haya den camber un saco cu 17 bala. Ta asina cu durante cu e investigacion tabata tumando lugar, J.H. a yega y e tambe a wordo deteni. C.H. y su pareha a wordo deteni.
For di interogacion a bin sali na cla cu e Glock lo tabata scondi bao di un isla traha den cushina. Tambe a sali na cla cu J.H. lo a yega di coy e arma aki.
Recherche a bay bek e cas y ora a bay check na e isla a bin haya un tas den cual tabatin un metrayador cu 3 peña y un silenciador.
Fiscal ta haya legalmente proba cu e trio aki tabatin e Glock di Polis y cu C.H. tabatin un arma automatico cu hopi bala. Fiscal a exigi 36 luna di prison pa C.H. di cual 12 luna ta condicional cu un tempo di prueba di 2 aña. Fiscal a exigi 18 luna di prison pa J.H. y 12 luna di prison pa M.H.
Hues despues di a scucha defensa di e abogadonan, a dicta sentencia di biaha. Hues ta haya e trio culpable. Pa cu e castigo di C.H., Hues a bay di acuerdo cu e defensa di mr. Carlo cu ta promer biaha cu C.H. ta cay cera. Pa loke ta e saco cu 17 bala cayente cu a haya den e camber, a declara C.H. liber di esaki. Hues a condena C.H. na 21 luna di prison, J.H. na 18 luna di prison y M.H. na 12 luna di prison. E metrayador lo wordo saca for di circulacion hunto cu e peñanan.