Home » Parlamentario Edgard Vrolijk (MEP): Un biaha mas AVP a demostra di ta contra pueblo di Aruba

Parlamentario Edgard Vrolijk (MEP): Un biaha mas AVP a demostra di ta contra pueblo di Aruba

by Admin
0 comment 67 views

 

 

Awe den ora laat di marduga 11 miembro di parlamentarionan di coalicion hunto parlamentario independiente a aproba e presupuesto supletorio pa pais Aruba pa locual ta aña 2020. E aña aki tawata un aña unda cu mundo completo incluyendo Aruba hamas por a premira cu un virus manera Covid 19 por a cambia rumbo di nos pais den un rato di ora. Sigur den esaki nos finansas publico cu tabata vulnerabel debi na mal maneho financiero di avp di 2009 pa 2017, unda a redobla nos debe nacional y a laga nos atras cu 93 % di nos GDP na debe. Banda di esaki a laga pueblo cu ni espacio pa paga proyectonan PPP y awo pueblo den tempo di Covid ta sinti e efecto di no a hiba un finansas saludabel, duradero y sostenibel di 2009 pa 2017.

 

Presupuesto 2020: di un surplus di 46 miyon pa un necesidad financiero di casi 1.1 biyon florin 

Gabinete Evelyn Wever-Croes desde su entrada na november 2017 su prioridad tabata pa hiba un maneho financiero saludabel, pero sigur pa trata den corto plazo pa reduci nos debe, debi cu nos a ser laga den un situacion financiero hopi vulnerabel door di Mike Eman y AVP. Bao Gabinete Evelyn Wever-Croes ya na 2018 nos a conoce un presupuesto cu un budget neutral y pa 2019 unda a acorda cu Hulanda cu por tin un deficit financiero di 25 miyon ya nos a conoce un surplus. Pa 2020 nos tabata riba e bon caminda pa tin un surplus di 46 miyon, pero na maart nos a ser confronta cu Covid 19 y nos unico pilar economico a ricibi un sla fuerte unda cu nos entradanan proyecta pa 2020 a cay completamente afo. E prome proyeccion tabata cu lo tin un necesidad financiero di alrededor di 1.6 biyon, pero danki na apertura di nos frontera y sigur ayudonan duna manera fase, loonsubsidie, midden en klein bedrijf y voedselpakket nos por a reduci e nesecidad financiero na poco menos cu 1.1 biyon florin.

 

Partido AVP a vota contra presupuesto supletorio

Ta di lamenta e postura aki contra un pueblo cu mas cu nunca mester positivismo y sigur sosten di parlamento cu ta representa e pueblo. Un presupuesto supletorio cu ta necesario pa nos por keda paga esnan cu ta haya ayudo di fase, loonsubsidie, midden en klein bedrijven, voedselpakket, trahadornan di gobierno cu mester percura pa yega na e fondonan pa nan cobra, pero tambe hopi necesario pa por pasa esaki pa aloca fondo pa entre otro nos trahadornan humilde di Serlimar por cobra. Banda di esaki ta necesario pa den tempo di crisis sigui inverti y pusha nos economia y pesey a aloca un suma di 40 miyon pa percura pa hende por traha y asina por percura pa sigui inverti den nos economia. Banda di esaki a aloca fondo pa entre otro pa brandweer p’asina por busca entre otro ademlucht toestel pa por garantisa nan seguridad y tambe fondo pa por yega na materialnan pa e vehiculonan cu awo ta den pesimo estado.

 

Pues di mi parti mi ta lamenta e actitud di partido AVP di a duna un muestra di ta desea lo peor pa e pueblo di Aruba y mientras awe debi na nan mal maneho financiero a haci nos posicion financiedo asina dificil. Si nan no a hiba un maneho di mal gasta placa di pueblo, awe nos situacion lo ta hopi diferente. Pero nos ta keda lucha cu positivismo pa por pone nos pais riba pia bek y sigur e luna di november aki cu Dios su poder nos lo por anuncia algun proyectonan grandi cu lo yuda nos hopi pa aña 2021, pero tambe pa e futuro generacion nos dilanti.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio