Home International White House ta acusa scientifico Fauci di ‘hunga politica’

White House ta acusa scientifico Fauci di ‘hunga politica’

SHARE

Den un entrevista tocante e pandemia di coronavirus, White House a acusa e experto di malesa infeccioso, Anthony Fauci, di ta hunga politica algun dia prome cu eleccion.
Dr Fauci a bisa Washington Post cu Estados Unidos por spera ”hopi dolor”.
Tambe el a duna su opinion tocante e manera con Presidente Donald Trump y su rival democratico, Joe Biden, ta mirando e pandemia.
Estados Unidos tin mas casona y mas morto cu cualkier otro pais.
Segun informacion colecta door di Johns Hopkins University, e cantidad di morto na Estados Unidos a surpasa 230.000, mientras cu a registra mas di 9 miyon caso.
Den su entrevista cu the Post, publica diasabra anochi, Dr Fauci a adverti cu “tur e streanan ta alinea robes, mirando cu, manera bo drenta den otoño y invierno, hendenan lo bai congrega paden, na cas.”
“Bo posicion no por ta pio.” el a bisa.
Ora a puntre tocante e strategia di ambos candidato presidencial, Dr Fauci a bisa cu Biden “ta tuma esaki den serio for di e perspectiva di salud publico”, mientras cu Trump “ta mirando esaki for di un perspectiva diferente…. e economia y reapertura di e pais”.
El a bisa cu Estados Unidos mester haci un “cambio abrupto” den practica di salud publico y comportacion.
E comentarionan aki a ocasiona un reaccion for di White House, kendenan a acusa Dr Fauci di ta purbando di reforza Biden su candidatura pa presidencia.
Vocero Judd Deere a bisa cu e comentarionan “ta inacceptabel y ta kibra tur norma”.
“Como miembro di e [US Coronavirus] Task Force, Dr Fauci tin e deber di expresa preocupacion of pusha pa un cambio den strategia, pero e no a haci esaki, al contrario a escohe pa critica e presidente den media y demostra publicamente kende e ta faborese politicamente, door di alaba e oponente,” el a bisa den un declaracion.
Fuente: BBC