Home Politics Minister Andin Bikker a introduci un ekipo special di maneho pa Cuerpo...

Minister Andin Bikker a introduci un ekipo special di maneho pa Cuerpo di Bombero

SHARE

Recientemente minister Andin Bikker a haci varios cambio den top di Cuerpo di Bombero, caminda a introduci un ekipo di maneho (‘Managementteam’) na cabes di e cuerpo. Esaki pa promove un maneho mas planifica y dirigi pa saca e cuerpo di e situacion di crisis cu el a haya su mes aden dor di, entre otro, cierto incidentenan, falta di planificacion structural pa mantencion di e ekiponan di trabou y edificionan y falta di bon comunicacion cu e trahadonan door di e directiva diario anterior. Den cuadro di mehoracion di e maneho di e cuerpo a scoge algun bombero mes y un ex-bombero cu tabata comandante interino, pues cu tin experiencia pa yuda den e Managementteam, mientras cu a atrae tambe ex-altocomisario Andrew Hoo pa uni na e team como un tipo di “crisis manager”.
“Pero no ta esey so. Mi a percura pa reenforsa e Managementteam cu un experto di e asina yama ‘Bedrijfsvoering’ y tambe e ekipo administrativo y hasta esun di recursonan humano, pa por garantisa cu e bomberonan ta central den tumamento di decisionnan riba asuntonan cu ta regarda personal”, asina minister Bikker a splica. Pues a combina experiencia, conocemento riba aspectonan bomberil y aspectonan di maneho di crisis den henter e top di Cuerpo di Bombero. E decisionan aki ta conta cu sosten y aprobacion di e Sindicato SINBA, cu ta representa gran mayoria di e trahadonan na Cuerpo di Bombero.
“Mi ta convenci cu e cambionan aki sin duda lo aporta na un miho funcionamento y drecha e ambiente na pia di trabou. Cuerpo di Bombero a traha hopi duro e ultimo lunanan aki den e crisis cu nos a haya nos mes aden y pa mi ta importante cu tur bombero ta bay traha tur dia cu smaak”, di acuerdo cu e mandatario. E decisionnan aki a drenta na vigor mesora y ta valido pa un periodo di 6 luna. Durante e tempo ey ta spera di por nota mehoracionnan y desaroyonan positivo den Cuerpo di Bombero.