Bo ta haya dificil pa bisa no? Semper bo ta purba adivina kiko otro hende lo kier pa bo haci? A bira tempo pa stop di haci esaki.
“Bo por bin e reunion aki?” No. “Si.”
“Bo ta liber diasabra anochi?” No, mi ta wak Spiral. “Si.”
“Mi por fia bo jacket preto?” No. “Si.”
“Bo kier pizza?” No. “Si.”
“Bo tin cinco minuut?” No. Mi no tin ni cinco seconde. “Si.”
“Bo por pasa buscami?” No. “Si.”
“Traha un copi di koffie pami ya cu bo ta eyden.” Stop om. “Sigur.”
Cada bes cu mi kier bisa no, mi ta preocupa pa e inconveniencia cu mi lo causa e persona cu ta haciendo e pregunta. Of cu e lo rabia. Of cu e lo keda desapunta. Of pa lag’e nan na caya. Of asumi cu ami ta fout. Of mi ta sinti culpabel. Of mi ta un hende cu no tin consideracion pa otro. Of cu nan no lo gustami y mi kier pa nan gustami. Of mi no ta un persona rasonabel. Of, of, of…
Mi a purba di imagina e prome biaha cu mi a haci e cos aki; e cabes ta bisa no, e boca ta bisa si. Tawata na un reunion familiar, como mucha muher di 6 of 7 aña, porta 8, birando consciente cu, aunke mi nana su deseonan hopi bes no tawata wordo vocifera, su actuacion pasivo-agresivo tawata mustrabo claramente locual e tawata kier y no tawata kier pa bo haci? Y mas aun, locual e tawata verwacht cu bo lo haci? Tawata na scol primario unda mi a realisa cu hende tawata gustabo mas – of sikiera tawata tolerabo – si bo tawata bai di acuerdo cu nan y haci locual nan tawata kier pa bo haci? Of tawata generalmente na cas, na unda mi a haya cu bida tawata mas facil si mi no ocasiona problema?
Mi relacion ambivalente cu autoridad ta bai bek na mi infancia. E impulso pa complace no ta consciente. Mi a wordo programa. E tawata locual mundo tawata spera dimi. Ta un “bon mucha” tawata mas importante. Nunca mi a puntra mi mes kiko ami tawata kier a haci of con ami tawata opina of pensa, si ami tawata di acuerdo, nunca mi a actua manera ami tawata kier a actua.
Esaki tawata ami, pa mayoria di mi bida adulto. Den terapia esaki ta wordo yama hypervigilancia y ainda mi ta catch mi mes ta hacie. Warda ariba un gesto. Y instantaneamente pensa kiko mi por a haci of bisa otro pa haya un reaccion diferente. E ta un cansancio y bo ta desperdicia bo bida.
Pero, no mas. Y bo sa ki dia el a stop? El a stop hunto cu mi menstruacion, tres aña pasa. O, y 18 luna di terapia. Pues, mi no ta atribui e cambio aki completamente na menopausa pero mi ta kere si, cu tin algo tocante e experiencia ey cu ta encurashabo of forsabo actua diferente. Pa saca afor locual sociedad a implanta den nos y enfoka ariba nos propio necesidadnan.
Recientemente ami cu mi casa a dicidi di bai biba na otro pais. E ta e decision corecto pa nos. Nos medio entusiasma, medio spanta, pero contento. Y tur e otro hendenan rond? No, nan no ta contento. Nos ta rondona di hende cu ta pensa cu nos ta cometiendo un eror y a pasa mayoria parti di e aña cu a pasa, ta bisa nos dicon. Y esey ta OK. Otro hendenan no ta contento. Nan ta rabia, preucupa of tristo. Nan mag di ta. Y si, mi ta sinti malo cu nan ta sinti malo tocante algo cu nos ta planeando pa haci. Y esey tambe ta OK. Pasobra pa prome biaha den mi bida mi ta sinti cu mi mag di haci locual mi kier haci. Esaki, despues di a pasa henter un bida purbando di evita cu otronan ta sinti malo.
Esaki ta un cambio enorme. Bai tras di mi instinto. Haci locual ami ta pensa cu ta corecto. Haci locual ta haci ami felis. Ainda mi ta worry bastante, mas cu mi lo kier, pero menos cu antes. Mi ta mehorando, pero e ta un progreso slow, pa bira confortabel cu ken bo ta despues di decadas di no por a haci esey. Pa stop di preocupa pa locual tur otro hende ta pensa no ta algo cu ta pasa di un dia pa otro. Pero e ta biniendo. Y mi guste.