Home Politics Economia y empresario Randall Croes di CUA: “Ta bon pa mantene...

Economia y empresario Randall Croes di CUA: “Ta bon pa mantene dialogo. E experiencia di competi pa sobrevivi no ta mescos den sector publico”

SHARE

 

 

ORANJESTAD – Comerciantenan Uni Aruba (CUA) ta un di e organisacionnan cu siman pasa a asisti na e session di brainstorming riba e tema di turismo. Representa pa Francis Saladin y Randall Croes, e ultimo aki ta esun cu a haci un presentacion riba con sector comercial por yuda y wordo yuda den e crisis genera pa e pandemia di COVID-19. Ambos a aporta den aspectonan financiero, laboral y di mercadeo pa nos isla.

Croes a remarca e importancia di nan participacion den e encuentro organisa pa Partido di Pueblo Arubano (AVP): “Nos ta kere cu partidonan politico ta goberna e isla, dus tur partido politico cu invita Comerciante Uni pa participa, nos lo participa pasobra asina nos ta influencia decisionnan di sector publico, nos ta sector priva. 

E economista di profesion a añadi cu CUA ta kere cu tur politico, pa tuma bon decision, e mester scucha opinionnan di esnan cu e ta goberna; clientenan, consumidor, trahadornan via di sindicato, comerciantenan via di nan gremionan. “Ta importante pa mantene e dialogo ey. Tin biaha bo tin cu bisa cos manera cu e ta, y algun politico no ta soporta y ta rabia y despues ta tuma un actitud, pero ta nos deber pa informa manera mester ta.”

Como comerciante nan tin cu biba den un mercado cruel, caminda si no competi, si no tin bon prijs of bon servicio, gewoon bo lugar ta cera. Experiencia di tur dia di competi pa sobrevivi no ta mescos cu den sector publico. Croes ta convenci cu ta bon pa informa politiconan di kico ta e problemanan cu tin eyfo pasobra e legislacion y sosten di gobierno ta haci un influencia den con nan ta funciona y si nan por crea rikeza of pobresa.

Basa riba e perspectiva historico di kico pandemianan a haci den pasado, Randall Croes a indica na e otro participantenan den e encuentro cu esun mas reciente na 1918 y a mata 50 miyon hende a cuminsa disparce despues di 2 aña y despues di 4 aña mundo a recupera por completo. Algo pa nos ta consciente di dje y di e tempo nos dilanti pa tuma decision pa lanta mihor for di e crisis aki.

“Ban probecha y wak atras kico ta e cosnan cu nos no a haci bon, haci cambionan den ley, den gasto di gobierno, den incentivonan, den strategia, den dialogo; pa asina e sector priva ta mas involucra cu sector publico den un sesion continuo y cu mas frecuencia. Croes ta conseha pa sinta cada tres of seis luna pa decisionnan cay lihe y nan wordo tuma y ehecuta pa asina nos recupera mas lihe. 

Entre e otro sugerencianan treci dilanti dor di e miembro di directiva di CUA, ta pa bon mantencion y mehoracion di atraccionnan turistico, incentivo na hotel y restaurant pa inverti y sosten den e trahadornan. Tambe a toca e punto di trahadornan stranhero cu tin hopi tempo riba e isla, pero cu si un bay tras di otro, no mester lubida cu nan tambe ta cliente di restaurant y tienda y por genera un buraco den mercado cu por afecta e local tambe. 

Un punto specifico cu CUA a introduci ta esun di un ‘Financial Hibernation’ den cual consciente cu e crisis aki tin un tempo mara na dje, banconan ta permiti negoshinan pa no baha nan debenan, pero si sigui paga interes riba nan prestamo. Esey lo yuda enormemente den e cash flow di e negoshi, y a cambio e sistema bancario ta obtene incentivo den forma di p.e. reduccion di winstbelasting, etc. E cash flow aki negoshinan por paga trahado, cumpra stock, renoba, y yuda wanta e crisis miho.