Home Politics Parlamentario Setty Christiaans-Yarzagaray: “Banco Central a presenta proyeccionnan econonomico mas recien...

Parlamentario Setty Christiaans-Yarzagaray: “Banco Central a presenta proyeccionnan econonomico mas recien den comision fiho di Parlamento”

SHARE

Desde inicio di e crisis causa pa Covid-19, Banco Central di Aruba (CBA), pero tambe otro instancianan manera Departamento di Asuntonan Economico y Comercio (DEACI) conhuntamente cu Centraal Bureau Statistiek (CBS), a comparti proyeccionnan pa asina duna indicacion di e panorama economico y financiero cu por spera y cu ta bay wordo afecta door di Covid-19. Efectonan manera cuanto por spera cu economia ta bay cay na Aruba, con e sector laboral lo por wordo afecta, efecto riba divisanan y efecto riba ingresonan na Aruba. 

No ta un secreto cu e efectonan di e pandemia di Covid-19 tin impacto hopi drastico riba economia y finansas na mundo y na pais Aruba, cu ta dificil premira realmente con diferente economia lo bay ta despues di e efectonan di e pandemia aki. 

 

Comision fiho di Finansas y Economia den Parlamento 

Mirando cu ya ta algo mas cu 7 luna desde Covid-19 su entrada na Aruba, Parlamentario Setty Christiaans-Yarzagaray, cu ta presidi e comision fiho di Finansas y Economia den Parlamento, ta hay’e necesario y importante pa invita instancianan cu ta haci proyeccionnan y ta publica datonan relata na economia di Aruba pa brinda Parlamento update kico por spera pa e resto di aña 2020 y unda cu por pa e aña venidero. Pa e motibo aki siman pasa a invita Banco Central di Aruba pa comparti e ultimo datonan di desaroyo y pronosticonan.

 

Presentacionnan di CBA 

CBA a brinda miembronan di Parlamento presentacion riba desaroyonan economico mas recien, proyeccion di scenarionan di GDP pa 2020 y proyeccion di scenarionan di Balansa di Pago (BOP) basa riba e efecto cu e crisis di Covid-19 tin riba e diferente areanan aki.

Pa loke ta trata e ultimo desaroyonan economico, CBA a ilustra datonan mas recien di reservanan y e componentenan contribuyente na reserva internacional, datonan di sector bancario, savings, fluctuacion den inflacion, datonan di turismo, uzo di utilidad y desaroyo den construccion. 

Riba e pronostico di GDP y su componentenan, CBA a presenta 3 diferente scenario pa tanto GDP nominal como real compara cu loke originalmente a spera pa aña 2020. E prome scenario cu actividad turistico no significante pa 3 luna yama “Quick Recovery”, e siguiente scenario cu actividad turistico no significante pa 6 luna yama “Slow Recovery” y e ultimo scenario cu actividad turistico no significante pa 9 luna yama “Lingering Recovery’. Datonan di pronostico di GDP real ta indica di experiencia caída di entre 25.4 te cu 32.3% pa aña 2020 basa riba e 3 scenarionan presenta.

Por ultimo, CBA a presenta su proyeccionnan di nan balansa di pago (BOP) basa riba e mesun 3 scenarionan cu a aplica pa GDP y su efecto riba reserva internacional. Esaki considerando algun risico den pronostico manera duracion di e pandemia, retraso y duda den proyectonan di inversion, prijs volatil di tanto fuel como importacion, desaroyo di turismo y necesidad financiero di pais Aruba entre otro.  

 

Pa conclui

Parlamento a ricibi basta informacion riba e dia aki di CBA cu a duna un bista di ultimo desaroyonan cu ta yuda tene nos miho informa y prepara kico por spera door di efecto di crisis di Covid-19, segun Parlamentario Yarzagaray. Conclusion si ta e caida drastico den Turismo ta e factor principal mas grandi cu ta afecta practicamente tur e aspecto di desaroyo economico y financiero.

Loke ta resalta no solamente di e presentacion di e instancia aki si no di mas instancia cu Parlamento a reuni cu nan y a ricibi informacion den e ultimo temponan aki ta, cu Turismo ta e industria cu mas ta influencia tur aspecto di nos economia pero cu ta Turismo lo determina tambe con lihe y con Aruba lo sali di e crisis aki ocasiona pa Covid-19.