Home Corte Homber cu a purba manda envelope yen di cocaina Hulanda dilanti Hues

Homber cu a purba manda envelope yen di cocaina Hulanda dilanti Hues

SHARE

 

ORANJESTAD – Awe mainta Corte di Husticia a trata e caso penal cu Ministerio Publico a cuminsa contra e homber S.B. Aruba Native por a compronde cu e sospechoso a presenta den sala di Corte hunto cu su abogado. Fiscal a acusa S.B. cu riba 21 di Maart 2019, el a exporta un cantidad di cocaina.

Ta asina cu Polis a bay haci control na un lugar di manda post cu un cacho. E cacho a reacciona positivo riba un envelope geel. A confisca envelope cu tabata destina pa Hulanda. E envelope a pisa 206,4 gram. Via camera di seguridad di e lugar,  a mira kende a hiba e envelope. A detene S.B. y el a admiti di a hiba e envelope. Den Corte, S.B. a bisa Hues cu el a haya e envelope for di un homber Hulandes. E tabata sa cu tin droga den e envelope y a haya 600 florin pa post esaki. Hues a puntr’e kende e persona ta. El a bisa Hues cu e no ta menciona nomber y cu e ta admiti di a haci un fout y cu e kier cambia su bida. Actualmente S.B. tin un trabou caminda door di e Covid e ta trahando 3 biaha pa siman.

Fiscal a bisa cu e ta haya legalmente proba cu S.B. a exporta droga. Fiscal a tene cuenta cu actualmente S.B. tin trabou mirando e pandemia di Corona Virus. Fiscal a exigi 240 ora di trabou y si no cumpli, 4 luna di prison. Tambe Fiscal a exigi 4 luna di prison condicional cu un tempo di prueba di 3 aña. Fiscal ta haya cu e 600 florin cu S.B. a haya di pago lo mester keda confisca. E chens ta existi cu S.B. lo mester deposita 600 florin na Ministerio Publico.

Abogado mr. Dijkhoff a bisa Hues cu ta promer biaha cu S.B. ta cay den man di husticia. El a admiti di a haci malo. E abogado ta contento di scucha Fiscal exigi trabao pa comunidad pa no perhudica S.B. cu su trabao.

Hues a sera tratamento di e caso y a dicta sentencia di biaha. Hues ta haya legalmente proba cu S.B. a exporta droga. El a tene cuenta cu e seriedad di e caso. Hues a tene cuenta cu S.B. a para responsabel cu el a haci malo y ta arrepenti. Mescos cu Fiscal, Hues a tene cuenta cu S.B. tin trabao den e pandemia Covid. Hues a bisa cu lo no bay manda sera S.B. sino lo condena S.B. na 3 luna di prison condicional cu un tempo di prueba di 3 aña. Hues a condena S.B. na 240 ora di trabou pa comunidad y si no haci’e, 4 luna di prison. Hues a bisa cu e no ta di acuerdo pa confisca 600 florin. E droga lo wordo destrui.