Home International Belgica: Trahadornan di salud Covid-positive a wordo pidi pa sigui traha

Belgica: Trahadornan di salud Covid-positive a wordo pidi pa sigui traha

SHARE

(CNN)Trahadornan di salud den algun hospital na Liege, e di tres ciudad di mas grandi di Belgica y actualmente un ‘hotspot’ di coronavirus, a wordo pidi pa sigui traha asta den caso cu nan test positivo pa Covid-19, tanten cu nan no tin sintoma.
Oficialnan di salud a adverti cu Belgica lo por yega na su limite di camanan di intensive care dentro di 2 siman y algun hospital ya ta sufriendo escasez. E pais di 11.5 miyon di habitante a raporta un averahe di mas di 13.000 caso nobo pa dia den e siman cu a pasa, segun e instituto nacional di salud publico Sciensano. E pandemia di Covid-19 na Belgica ta nr. 2 na Europa den termino di casonan nobo per capita, despues di Czech Republic.
Yves Van Laethem, vocero di Belgica den e lucha contra coronavirus, a adverti cu, si Belgica no cambia su comportacion, nan intensive care lo yega na un capacidad di 2.000 paciente dentro di 15 dia.
Liege, e ciudad mas grandi den e parti habla Frances di e region di Wallonia, tin e nivel di mas halto di incidencia na Belgica. E director di comunicacion di Liege University Hospital, Louis Maraite, a bisa CNN diamars, cu pa motibo di falta di personal, e hospital no tawata tin otro opcion cu puntra enfermeronan cu a test positivo sin sintoma, pa traha a base voluntario. “Dokternan no ta wordo pidi pa haci esaki, mirando cu no tin scarsedad di dokter,” Maraite a bisa den un siguiente interview diaranson.
“Esaki no ta un problema, mirando cu nan ta trahando den lugarnan unda tin paciente cu tambe a test positivo”. Maraite a calcula cu 5% to 10% di enfermeronan di hospital ta infecta cu Covid-19, pero mayoria di nan ta na cas.
Trahadornan di salud, cu tin sintoma manera kentura, a wordo pidi pa no bin traha y Maraite a bisa cu hospital no por forsa trahadornan asintomatico pa presenta na trabou.
Otro hospital na Liège, CHC MontLégia, tambe a confirma na CNN cu trahadornan di salud asintomatico a wordo pidi pa sigui traha a base voluntario, observando reglanan di hygiena estricto cu ta inclui contacto limita cu nan coleganan.
E vocero di e departamento di comunicacion di e hospital a bisa CNN cu personal positivo asintomatico ta trahando principalmente den unidadnan di Covid-19 pero lo por traha den tur unidad, incluyendo esunnan unda no tin paciente di Covid, cu excepcion di e unidadnan di geriatria, neonatologia y oncologia, na unda tin pacientenan cu ta particularmente vulnerabel.
Un vocero pa e ministerio di salud di Belgica a bisa CNN cu e permiso pa laga trahadornan di salud asintomatico sigui traha ta wordo otorga bou di condicionnan hopi estricto, pasobra no tin suficiente trahador di salud. “Nos ta purba percura pa e siguridad di tur paciente,” el a agrega.
Den un conferencia di prensa di dialuna, Van Laethem a bisa cu 1.000 di e camanan di intensive care di e pais, actualmente ta wordo usa, cu un total di 1.250 prepara pa wordo ocupa fin di siman. E cantidad di paciente interna den tanto hospital como intensive care ta redoblando cada 8 dia, el a agrega.
Den un entrevista cu RTBF dialuna, Van Laethem a bisa cu un decision lo wordo tuma tocante un posibel segundo lockdown prome cu fin di siman, agregando cu, si Belgica no mira señal un reduccion di e cantidad di paciente cu a rekeri hospitalizacion, medidanan mas estricto lo por ta necesario.
Gobierno a implementa reglanan nobo pa habitantenan pa purba frena e plamamento di e virus. Toque de queda diario for di 12or di anochi te cu 5or di marduga, no por sinta den restaurant of cafes, y hendenan ta wordo pidi pa traha na cas, si esaki ta posibel. Eventonan deportivo amateur a wordo cancela y tur competencia profesional mester tuma lugar sin publico.
Mientras cu Van Laethem a bisa cu lo por ta posibel pa sali for di e situacion aki sin un lockdown, autoridadnan ta preparando pa tur eventualidad, y si un segundo lockdown resulta necesario, gobierno no lo bai warda dos pa tres dia prome esaki bai na vigor.
Belgica a registra un total di 333.718 caso y 10.899 morto desde e comienzo di e pandemia, segun Sciensano.