ORANJESTAD – Jan van Nes a participa siman pasa den e session di brainstorming titula ‘Turismo den Perspectiva: Scucha, Pensa, Recupera Mihor’ representante Food & Beverage Association y Aruba Gastronomic Association. Aki e veterano di industria horeca a indica cu ta imperativo ahustenan inmediato c uta permiti e sector aki di nos economía sobrebibi e efecto devastador di COVID-19. “Prome cu por papia di perspectiva, mester pone e base pa varios cambio cu mester pa añanan caba,” van Nes a indica.
E evento organisa pa Partido di Pueblo Arubano (AVP) a trece hunto representantenan di sectornan comercial, laboral y turistico pa trece dilanti nan preocupacion, pero tambe nan sugerencia pa hunto Sali afo di e momento dificil cu nos isla ta pasando aden. Van Nes a comparti pakico nan a participa den e encuentro bisando cu “nos a sinti cu, apesar cu nos ta traha anochi, toch a pone algo di nos parti pasobra nos kier ta parti di e solucion.”
Durante e presentacion duna pa e representante di bar y restaurantnan a trece dilanti cu ta necesario un flexibilisacion di e leynan laboral dunando e siguiente ehempel: “Nos tin masha hopi hende cu awo ta sin trabou y ta aplicando, pero hendenan cu realmente no ta motiva. Hecho ta cu pan mester bin pan riba mesa, pero horeca nunca tabata e doel; aworaki el a bira e necesidad.”
Segun van Nes, e situacion aki ta pone cu e periodo di prueba actual stipula pa ley ta crea un sorto di ‘revolving door’ cu ta obliga e negoshi busca otro hende, y despues un otro, y despues un otro atrobe. E sugerencia ta pa expande e period di prueba na tres of cuater luna adaptando ley 1613 x, mescos cu LMA cu tur hende ta convenci mester conoce cambio finalmente. Tambe e sector ta boga pa ehecuta e Master Plan y consecuentemente por papia di otro retonan.
“Hecho ta cu COVID-19 a dal nos duro, y manera Jim Hepple a mustra, ta algo cu no ta bay disparce. Ta bay tuma su bon tempo prome cu por papia di un recuperacion.” Tur esaki ta puntonan cu ambos asociacion a comparti cu Gobierno di Aruba atrabes di cartanan manda dor di AHATA y ATIA, entre otro. “Mi ta spera cu pronto e tripartite por bini hunto pa discuti e diferente reto y solucionnan nos dilanti,” van Nes a finalisa bisando y refiriendo na un encuentro pendiente cu gobierno.