Home International Reporte mundial di coronavirus: Casi 500.000 caso nobo na Estados Unidos den...

Reporte mundial di coronavirus: Casi 500.000 caso nobo na Estados Unidos den un siman di tempo; Europa por spera mas lockdown

SHARE

Estados Unidos a agrega casi mei miyon hende na su lista di infeccion di coronavirus durante e ultimo 7 dianan, mientras cu Donald Trump ta sigui insisti cu e pais ta logrando pa domina e pandemia.
Caso 500.000 hende a wordo contagia cu Covid-19 na Estados Unidos den e ultimo 7 dianan, cu cantidad record di hospitalizacion den e parti Midwest. E total den e ultimo 7 dianan tawata 491.000, segun Johns Hopkins University.
Estados Unidos tin e cantidad mas halto di infeccion na mundo, cu mas di 8.7 miyion di hende cu a contagia cu e virus. E cantidad di morto na Estados Unidos tambe ta esun di mas halto, mas di 226.000.
Pero diamars pasa, White House a inclui dentro di su lista di logronan pa e aña aki: “Caba cu e pandemia di Covid-19”. E press release cu ta acompaña un rapport di 62 pagina, procedente di e officina di sciencia y tecnologia di White House, ta inclui den su “highlights” e frase “Termina e pandemia”.
E press release ta bisa cu desde e comienso di e pandemia di Covid-19, e administracion a tuma pasonan decisivo pa inclui profesionalnan cu por compronde, trata y vence e malesa.
Trump, cu ta premira un bataya dificil di re-eleccion dia 3 di november, a reitera esaki diamars, bisando cu e pais ta logrando pa domina e pandemia cu a mata mas di 226.000 hende desde su inicio ma maart 2020.
“Nos a zorg pa ventiladornan, nos a zorg pa tur ekipo y awor nos ta zorg pa un vacuna, nos ta zorg pa terapia. Nos a haci un bon trabou y hendenan ta cuminsa wak esaki.” Trump a bisa reporteronan na White House.
Infectionnan ta subiendo rapidamente den varios otro pais, principalmente na Europa y India.
Prome minister Frances, Jean Castex, a bisa diamars, cu intensive care units di hospital lo ta completamente yen di paciente di Covid-19 entrante 11 di november si nada wordo haci pa stop e pandemia den e pais.
Presidente Emmanuel Macron a anuncia cu e lo duna un discurso na television diaranson tocante reportenan cu su gobierno lo ta consideranto di pone e pais den lockdown pa un luna pa stop e aumento di caso. Francia a raporta 33.417 caso nobo diamars ultimo, y 523 morto, e cantidad mas grandi di morto diario desde april 2020. Reino Unido tambe a mira su total di mas halto desde mei 2020.
Casonan nobo y cantidad di mortonan ta subiendo tambe na Italia, na unda tawata tin mas protesta diamars contra e ultimo medidanan di lockdown di e gobierno.
Na Alemania, Angela Merkel ta spera di pusha pa un “lockdown light” den e conversacionnan cu lidernan regional diaranson. E restriccionnan nobo cu ta wordo proponi, ta inclui cierre di restaurant y barnan y limitenan estricto pa reunionnan di grupo, mientras cu scolnan, pasadia y shopnan lo keda habri.
Casonan di coronavirus na India: Tawata falta 10.000 pa yega 8 miyon, mientras cu den e ultimo 24 ora a wordo reporta 43.893 caso nobo.
China tambe a mira un crecemento den casonan, cu 42 infeccion nobo, e cantidad diario di mas halto den mas di dos luna, door di un aumento den contagio den e region noordwest di Xinjiang, segun autoridad di salud di e pais a bisa diaranson. E cantidad diario ta esun di mas halto desde cu a confirma 44 infeccion dia 10 di augustus.
Na Estados Unidos, Trump su remarcanan ta den contraste cu un aumento alarmante di infeccion den henter e pais.
Actualmente ‘corona hotspots’ ta inclui Illinois, cu un cantidad di 31.000 infection nobo den e siman cu a pasa, y dos estado crucial den e careda presidencial: Pennsylvania y Wisconsin.
Wisconsin a kibra recordnan diario di infeccion y morto; oficialnan di estado a bisa habitantenan pa keda cas, bisti masker y cancela reunionnan social.
Alaska a set un record nobo pa testnan positivo durante weekend cu a pasa y algun di e areanan mas afecta ta comunidadnan di populacion Nativo Americano.
Mas di 5.600 hende a muri di coronavirus na Merca den e ultimo siman, cu hospitalizacion creciendo te na 13%, un analista di Reuters a mustra.
Expertonan di salud ta pensa cu e virus ta creciendo, door di reunionnan social priva, e temperatura mas friu cu ta pone cu hende ta keda paden y e cansancio di e Mericanonan pa cu e restriccionnan vigente pa mas cu 6 luna caba, en coneccion cu Covid-19.