Fundashon Nos Kier Boneiru Bek I e pueblo Boneriano ta felista e pueblo di Sint Estatius pa su viktoria abrumador riba 21 oktober 2020, re-afirmando e liderazgo di PLP komo nan legitimo representashon demokratiko legal. E pueblo di Statia a demonstra ku e viktoria aki ku nunka nan a asepta e traishon I violashon di nan derecho sagrado demokratiko I a manda un mensahe kla pa Den Haag. Na Februari 2018 e Gobierno Hulandes lidera pa nan Sekretario di Estado, ex-militar, kolonel Knops a deroka e mesun gobierno ku e mesun lidernan, pa medio di un akshon no-demokratiko, abuso di poder, un golpe di estado.
Un momento historiko di viktoria pa e pueblo Statiano, fuerte I determina, derotando kolonialismo Hulandes di siglo 21. Un rechazo resonante kontra gobernashon-kolonial-Hulandes, hopi fuerte, hopi kla, reklamando bek I restorando nan gobierno ku nan mes a elegi na mart 2015. Re-asegurando ku ta pueblo ta esun ku ta huzga I disidi, kua gobierno nan ta desea. Esaki ta sirbi komo un mensahe di kurashi I speranza pa tur e otro islanan Antiano, spesialmente esnan outonomo mas grandi, Korsou, Aruba I St Maarten, ku na e momento aki ta bao di preshon di e gobierno Hulandes, usando e krisis di Covid pa blackmail nan, forsando nan pa sede nan outonomia pa un fiansa kontra kondishonan inapropia. Statia a lanta bek I ta surgi grandemente komo un nashon un pueblo ku dignidat, ku kier disidi nan mes riba nan mes isla, pa determina nan mes destino, I kier proteha nan derecho sagrado fundamental di demokrasia, derecho di outo-determinashon I propio-gobernashon.
Mientras ku e gobierno di Statia tabata tratando pa honra I respeta e bos I desishon demokratiko di nan pueblo pa rekobra bek nan outonomia, e gobierno Hulandes , inisialmente minister Plasterk I despues sekretario-di-estado Knops tabata ninga e pueblo I gobierno di Statia e derechonan fundamental aki.
Durante tur e tempu aki, kaminda e gobierno Hulandes, abusando di poder, ku leynan inhustu, kometiendo krimen kontra humanidat, kontra e pueblo di Statia, kasi tur e liderzago Antiano I gobiernonan I partido politikonan, no a hasi nada, pa kondena e gobierno Hulandes o sostene I proteha Statia su kousa hustu, nan lucha pa Hulanda respeta nan derechonan inalienabel. NKBB tabata un di e uniko aliansanan di Statia ku a lanta para kontra Hulanda, I alsa voz, bringa bek, frontalmente kontra gobierno Hulandes pa motibu di nan akshonan no-demokratiko abusivo kontra di e pueblo Statiano. Huntu den aliansa ku e liderazgo di e gobierno di Sint Eustatius, NKBB a embarka riba e trajektoria pa rekobra bek nan outonomia, direkshon di Nashonan Uni su headquarters I komunidat internashonal pa konsientisa I mas tokante e aneksashon illegal di Bonaire I Sint Eustatius riba 10-10-10. Despues ku e gobierno Hulandes a deroka ilegalmente e gobierno legitimo di Sint Eustatius, NKBB huntu ku un representante di e gobierno di Statia a hasi un otro avanse historiko na April 2018, pa reuni ofisialmente ku e headquarters di Caricom na Guyana, I denunsia e akshonan ilegal di gobierno Hulandes, I logra ku e “white paper” di gobierno di Statia wordu entrega ofisialmente I reparti bao di tur miembronan di Caricom. Esaki ta pa di prome biaha ku e liderzago-di-Caricom a wordu ofisialmente informa I a komprende kiko a pasa ku e islanan Antiano despues di e dismantelashon di Antia Hulandes na 10-10-10.
Awe nos ta mira bek riba e resiente batayanan historiko pa derechonan di e pueblo di Statia, pero mas importante awor ta e pueblo Statiano su akshon heroiko ku a disidi pa pone e mesun lidernan di gobierno ku kurashi, bek na e frente di nan lucha, pa sigui bringa pa nan, moviendo dilanti aspirando nan legitimo derechonan di outo-determinashon I derechonan humano.
James Finies, Nos Ke Boneiru Bek