Home » Parlamentario Richard Arends: Gobierno ta evita di atende cu e retonan real di nos pais

Parlamentario Richard Arends: Gobierno ta evita di atende cu e retonan real di nos pais

by Admin
0 comment 61 views

Fraccion di AVP a lamenta cu tratamento di presupuesto supletorio 2020 mester a wordo posponi pa motibo cu Gobierno no tabata cla cu su nota di cambio. Miembro di fraccion di AVP, mr. drs. Richard Arends, a bisa cu e ta haña esaki straño como cu Gobierno hustamente lo a cambia e formato di e cuadro financiero di tal manera cu ta hasi cambionan den gasto y entradanan durante aña mucho mas facil. Segun Arends, e desaroyonan politico entre partidonan den gobierno seguramente a hunga un rol cu a dicidi di cancela e reunion aki.

E miembro di fraccion di AVP a mustra cu ainda Aruba ta pasando den un situacion hopi grave caminda por wak esaki den entradanan di Pais Aruba cu a cay drasticamente compara cu aña pasa. “Tambe den acticvidadnan economico no ta tumando luga manera cu nos ta desea y hasiendo un recuperacion mucho mas lento y largo,” e la declara. Sr Arends a agrega tambe cu por wak tambe un ausencia di un maneho riba termino cortico.

“Si nos wak pronosticonan di aeropuerto, ta tene cuenta cu aki cinco aña nos lo ta bek na cifranan di aña 2019. E pregunta clave e ora lo ta kico ta bay sosode den e cinco añanan nos dilanti, te ora cu nos economia recupera manera cu nos tabata custuma cune. Un plan pa diversificacion di bo economia riba termino largo, no ta yudabo mucho den e periodo aki. Kico tin pa empresanan mediano chikito, kico tin pa e artista, kico tin pa e trahadonan independiente? Esaki ta preguntanan cu nos ta haci gobierno constantemente y nos no a ricibi contesta concreto di parti di Gobierno,” e la splica.

Sr. Arends seguramente ta aplaudi cu Gobierno hunto cu expertonan a tuma iniciativa pa delinea un masterplan riba termino largo, pero bo mester sa tambe cu ken bo ta conta na momento di reposiciona bo belanan: ken a sobrebibi y lo tey pa duna contenido na bo actividadnan economico nobo? “Mester tin atencion pa esaki pasobra ta e empresa mediano chikito aki semper tabata e weso di lomba di nos economia y lo sigui ta esaki y di parti di fraccion di AVP, nos ta haya un silencio y un falta di un maneho specifico pa e grupo aki,” Sr. Arends a bisa.
Banda di e sosten financiero, bo tin mester di un sosten economico tambe. Segun Arends tin un diferencia substancial entre e dos formanan aki di duna estimulo na bo actividadnan economico. E parlamentario a enfatisa su precupacion pa e desaroyonan den mercado laboral. E la hasi un serie di pregunta na Gobierno, pero ainda no a ricibi contesta. “Ricibiendo loonsubisidie mes, sector comercial a indica di lo mester manda 15 mil hende cas. Si loonsubsidie cay afor, e cantidad lo surpasa 35 mil hende. Gobierno sistematicamente ta nengando di ricibi peticion nan pa retira empleadonan,” e parlamentario a indica. Esaki no ta un situacion duradero y e kier sa di Gobierno cua ta su maneho y si a sinta na mesa caba cu gremionan pa atende e asunto aki.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio