Recientemente Minister di Transporte, Comunicacion y Sector Primario, sr. Chris Romero, a tene un reunion cu piscadornan John Laurens y Dano Carolina, pa amplia mas riba e sistema di Gedoogbeleid pa loke ta trata tiramento di pisca.
Durante e reunion aki sres. Laurens y Carolina a wordo informa riba e proceso pa trata e landsbesluit, unda cu tur rekisito pa por tira pisca mester keda finalisa. Tambe Minister Romero a informa e piscadornan cu e proceso di inscripcion pa por bin na remarke pa haya e permiso di tira pisca, ta tumando lugar y e respuesta ta bastante positivo. Siguientemente mester bin cu e proceso di registracion di harpun pa asina e tiradornan por haya nan permisonan pertinente.
Den e diferente topiconan cu a keda treci dilanti durante e reunion aki, a papia tambe riba e sitionan cu por eherce tiramento di pisca. Di parti di e piscadornan Minister Romero a haya diferente conseho y punto di bista pa cu zonificacion y areanan mas adecua pa tiramento di pisca. Pero tambe e piscadornan a comparti cu Minister Romero nan experencia personal den e mundo di pesca y na mes momento expresa nan satisfaccion cu finalmente, despues di tanto tempo, nan por realisa nan practica legalmente pa por sostene nan famia.
Tabata un reunion bastante fructifero unda cu palabracionnan concreto a keda haci y e compromiso di mantene un comunicacion estrecho a wordo reafirma.