ORANJESTAD – Corte den Promer Instancia a trata e caso penal cu Ministerio Publico a cuminsa contra e homber A., di Peru biba na Aruba. Aruba Native por a compronde cu tratamento di e caso a bay via video conference caminda Fiscal a exigi 12 luna di prison di cual 6 luna ta condicional pa e homber A.
Fiscal ta acusa A. di a haci actonan inmoral cu un mucha muher bao di 12 aña entre 1 Augustus 2017 y December 2019 y a penetra e mucha. Subsidiario Fiscal ta acusa A. cu den e mesun periodo lo a mishi cu e mucha so.
A. a bisa Hues cu loke el a declara na Polis, esey ta e berdad y e ta lamenta. Hues a mustra cu A. a declara na Polis cu e mucha tabata bay hunga cu e yiu di A. na su cas. Nan sa bay hunga den camber unda ta drumi. Nan ta mas den camber cu den sala. Mayoria biaha den weekend e mucha ta bin serca e yiu muher di A.. A. a bisa cu e sa bay den camber y riba tablet nan ta mira cartoons. Lo tabatin momento cu e mucha su curpa a mishi cun’e y A. lo a bay caricia e mucha. Segun A. el a mishi pero despues el a sinti su mes hopi malo y a sali bay. El a bisa cu el a mishi cu e mucha 4 biaha. Hues a remarca si A. a bisa cu el a sinti hopi malo loke el a haci promer biaha, e no ta compronde pakico A. a sigui mishi. Segun A., el a mishi cu e mucha na su panja y panty pero no tabatin penetracion. Segun A., si algo a pasa, e tabata den wega. Hues a mustra cu tin diferente interogacion y diferente biaha A. a duna declaracion diferente. A. a bisa Hues e tabata hunga cu e mucha y na dado momento a mishi cu e mucha na su parti intimo y el a spanta y a stop. Segun A. no ta 4 sino 3 biaha el a mishi cu e mucha.
Hues a mustra declaracion di mama di e mucha, kende a bisa cu el a papia cu A. y A. a cuminsa yora. El a bisa cu A. ta un hende cu ta bay misa y no ta compronde con esaki por a sosode.
Hues a mustra cu segun e raport di psycologo, A. ta reconoce cu el a haci malo pero no ta tuma responsabilidad pa su hechonan. E no ta haya cu loke el a haci ta asina grave. E tin hopi berguenza di loke el a haci. Psycologo ta kere cu lo ta bon pa A. haya tratamento despues cu e Sali for di KIA.
E mama a haci demanda y a bisa Hues cu su otro yiu chikito tambe a wordo mishi door di A. El a remarca cu su otro yiu muher tambe a keda afecta. E mama a splica cu su yiunan ta bao tratamento di psychiater.
Fiscal a bisa cu e ta un caso hopi tristo y lamentable. Casonan asina aki semper ta dificil pa prueba. Fiscal ta haya cu no tin prueba suficiente pa e acusacion di mishi na parti intimo. Si Fiscal ta haya cu A. a pasa man pero riba panja di e mucha na su partinan intimo. Tambe cu a caricia full e mucha su curpa. Fiscal ta haya A. ta culpable di actonan inmoral cu e mucha pero no tin penetracion. Fiscal a exigi 12 luna di prison di cual 6 luna ta condicional cu 2 anja di prueba bou guia di Reclasering. Esaki ta encera cu A. mester sigui tur indicacion di Reclasering. Tambe Fiscal a pidi pa prohibi A., drenta den contacto cu mama y e yiu pasobra nan ta bisinja. Fiscal ta haya cu e mama ta hopi razonabel cu e demanda pasobra no a pone e parti inmaterial. Fiscal ta kere cu e otro ruman muher tambe a keda afecta. El a pidi Hues pa confirma e demanda di 16 mil florin.
Hues a sera tratamento di e caso y a bisa cu e lo bay studia e caso y dia 13 November 2020 lo tin sentencia.