ORANJESTAD, 24 oktober 2020. Segun resumen di awe 26 persona a recupera, tin un total di 9 caso nobo di Covid-19, di cual tur ta residente, (“positivity rate” bou residente ta 9%). E total di casonan activo ta awe 188, total di testnan haci ta 266, testnan haci bou di residentenan na laboratorio di hospital ta 103. E total di casonan di fayecimento relaciona na Covid-19 ta na 36.
Hospital ta informa cu tin un total di 12 persona interna di cual 2 den Cuido Intensivo y 10 ta isola riba piso general.
Cifrasnan di casonan positivo hunto cu e “positivity rate” ta sigui baha, dunando tur indicacion cu e transmision ta sosodiendo riba un forma limita y manehable. Esaki sigur ta un hopi bon señal. E virus di Covid-19 lo no desaparese pa awor y e yabi den e pandemia aki ta pa controla of maneha e cantidad di contagio of transmision y preveni cu e cantidad ta subi demasiado den un corto tempo. Danki na e esfueso di cada uno di nos aki na Aruba nos ta manehando e casonan.
Pa nos sigui controla Covid-19 ta importante pa comunidad ta alerto y na prome indicacion di sintoma tuma contacto cu dokter di cas pa por haci un test. Door di isola e casonan positivo nos por controla e virus y stop e di sigui plama.
Ban sigui cuida y practica disciplina cu consistentemente. Aruba ta conta cu bo pa sigui controla e virus di Covid-19. Uni nos lo Vence!