ORANJESTAD – Un sesion informativo tipo brainstorm titula ‘Turismo den Perspectiva: Scucha, Pensa, Recupera Mihor’ a tuma luga diahuebs anochi na Renaissance Convention Center. E evento tabata organisa pa Partido AVP hunto cu Fundacion Mito Croes pa Estudionan Social Cristian Aruba, Fundacion Instituto Digna Lacle Herrera pa Formacion Politico y Plataforma Hobennan Profesional.
Lider di partido AVP Mike Eman a habri e encuentro señalando e retonan cu industria di turismo ta afronta y lo sigui afronta den e añanan nos dilanti; motibo clave pa cual tin mester di un reunion di e tipo aki caminda ta sinta cu gremio hotelero, comercial y di labor pa dialoga intercambiando puntonan di bista y yega na solucionnan. E meta ta pa “scucha comunidad, recoge pensamento y traduci e ideanan den un plan di recuperacion,” Eman a señala bisando tambe cu historia a mustra cu na varios ocasion Aruba mester a bini hunto pa afronta retonan, y lo bolbe haci esaki.
James Hepple, ex director di Aruba Hotel & Tourism Association (AHATA) y actual director di Tourism Analytics, un compania priva a duna presentacion cu cifranan concreto. Hepple a menciona con e crisis di Natalee Holloway a tuma 3 aña pa recupera di dje, loke por ta un indicacion pa futuro. E pronostico di ATA ta den mesun liña cu esnan pa región di Caribe, mientras cu AHATA ta pronostica un promedio di 45% di ocupacion y ainda ningun hende por bisa kico ta bay pasa cu industria di turismo crucero. Tambe Hepple a menciona cu por spera un reduccion di inventario di cambernan di hotel entre e di dos y e di tres trimester di 2021.
Presidente di Camara di Comercio y Industria (KVK), Satish Daryanani a hiba palabra cu recomendacion pa enfoca nos esfuerzonan pa atrae gruponan di tamaño chikito y mediano, mescos cu gruponan niche pa crea un miho prestacion pa comercio local. Daryanani tambe a indica cu Aruba mester realisa lo mas pronto posibel cu mester prepara y adapta pa tecnologia caminda e consumidor semper ta den control di su experiencia pa medio di aplicacionnan ‘on demand’. “Nos por sali dilanti, pero tur hende tin cu aporta,” el a conclui bisando.
Comerciantenan Uni Aruba tabata representa den figura di Francis Saladin y Randall Croes, caminda e ultimo aki a hiba palabra. Croes a cuminsa na bisa cu e crisis aki a demostra cu no por sigui ta dependiente di un solo mercado; mester diversifica. Tambe a menciona cu ta necesario un moratorio riba camber di hotel pa resguarda e longevidad di propiedadnan existente. Den aspecto di mercadeo di Aruba, ta primordial pa eleva e presencia di nos isla den social media y adapta nos facilidad y atraccionnan na e mercado di nivel halto cu nos ta desea di atrae, pa por brinda ‘value for money’.
Jan van Nes di Aruba Gastronomic Association/Aruba Food & Beverage Association, como un di e industrianan mas afecta na nivel mundial cu caída di 75% den benta. “Nos no kier reconoce cu algun hotel lo cera, pero nos mester ta realístico cu esey lo pasa.” Den futuro ta wak disturbio social dor di e miles di hende riba FASE, loonsubsidie pasono sa kico ta bay pasa cu esakinan despues di december. Ademas di e caida den turismo, e sector di horeca ta afronta obstaculonan for di entidadnan publico manera DPL y Dimas den nan operacion.
Anselmo Pontilius tabata hopi cla ora di enfatisa cu ora di eleccion gobernante y politico su atencion ta den campaña y no den soluciona problemanan. “Mester di un acuerdo nacional awo!” el a declara. Na mes momento mester un campaña den comunidad pa conscientisa riba austeridad pa ahusta na e realidad nobo y cu no por sigui hiba mesun estilo di bida cu antes. “Nos no tin tempo pa papia” paso hopi compania ya a indica cu lo cera si loonsubsidie stop.
E sesion a conclui cu un espacio caminda comision organizado consistiendo di drs. Rene Herde, Marksonn Maduro, Robert Candelaria, mr. drs. Richard Arends, mr. Gerlien Croes, Jennifer Arends Reyes y Mike Eman por a haci pregunta y tur presente por a dialoga riba e ideanan cu a bin dilanti.
Similar na e rapport elabora riba base di e sesion di brainstorming riba COVID-19 realisa algun luna atras, e comision organizador lo prepara un documento c uta inclui e puntonan principal treci dilanti ademas di e conclusion y propuestanan factibel.
