Home » Parlamentario Richard Arends (AVP) Ainda gobierno mester fia 525 miyon florin

Parlamentario Richard Arends (AVP) Ainda gobierno mester fia 525 miyon florin

by Admin
0 comment 49 views

 

 

Diadomingo anochi, miembronan di Parlamento e ricibi notificacion cu tratamento di presupuesto supletorio 2020, cu tabata planea pa dialuna mainta, a wordo posponi te proximo aviso. “E motibo no ta conoci,” asina miembro di fraccion di AVP, Parlamentario mr. drs. Richard Arends a duna di conoce. “E ta algo cu sin duda ta di lamenta, pasobra e ta contribui na e incertidumbre politico y di recuperacion economico cu nos pais ta bibando anden. Falta tres luna prome cu aña caba, y nos fraccion tin hopi pregunta ainda pa loke ta ehecucion di presupuesto y e strategia pa loke ta financiamento cu mester wordo regla prome cu fin di aña.”

 

Den su analisis, Parlamentario  Arends a indica cu mientras e cantidad di personal di Gobierno a keda ma mesun nivel di prome cu COVID, e gastonan di personal si a baha drasticamente cu 35 miyon florin. “Esaki ta danki na e contribucion di empleadonan publico pa loke ta trata reduccion di nan salario y tambe nan beneficionan.” Parlamentario Arends a sigui mustra e gastonan di producto y servicio, gastonan di operacion di gobierno, gastonan di abogadonan y conseheronan,  gastonan di huur di oficinanan, esakinan a baha cu solamente 9 miyon florin. 

 

Aki Parlamentario Arends a mustra cu por tin un discrepancia hopi grandi entre e reduccion di gasto di personal cu a baha dor di reduccion di salario di empleadonan publico y  gastonan di operacion di gobierno cu a keda practicamente mescos. “E recortenan aplicable pa empleadonan di Gobierno no ta aplicable pa e gastonan di abogado cu ta cobra pa ora: esakinan a keda mescos segun e propio contestanan di Gobierno,” Arends a splika. “Esaki ta algo inacceptable.”

 

Nos economia lo cai cu casi 30% e aña aki pa motibo di e efectonan di e crisis y actividadnan economico lo disminui di forma sin precedente, pero gobierno su gastonan operacional ta keda business as usual. Mientras cu e deficit a baha cu di 1.3 biyon pa 1.1 biyon, e entradanan di impuesto a subi cu 130 miyon di florin. “Ainda Gobierno rin 525 miyon di florin na gasto cu no ta financia. Gobierno mester busca financiamento pa e suma aki, of e lo mester corta den su gastonan e proximo lunanan nos dilanti. No ta conoci si tin espacio financiero riba mercado pa haci esaki of si nos ta depende di Hulanda of di mercadonan internacional pa por satisface e necesidad aki,” Parlamentario Richard Arends a mustra.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio