ORANJESTAD – Awe mainta Corte den Promer Instancia a trata e caso penal cu Ministerio Publico a cuminsa contra e hoben homber W.M.V. (19). Aruba Native por a compronde cu Polis, durante patruya a dicidi di tene un control y a haya W.M.V. cu un revolver hinca den un tas. Esaki a sosode na e parkinglot na Nikky Beach.
E acusacion cu Fiscal a presenta ayera mainta contra W.M.V. ta cu entre 3 y 5 di September 2020, e tabatin un revolver Caliber 38 cu 6 bala hunto cun’e.
Fiscal a bisa cu e ta haya legalmente proba cu W.M.V. tabatin un arma di candela y balanan. Aunke cu e arma no ta funciona bon pero e ta un arma. A haya 6,1 gram di marihuana tambe den e tas pero no ta concentra riba esaki. Pa cu e castigo, Fiscal a bisa cu e ta tene cuenta cu W.M.V. a coopera cu e investigacion. Fiscal a exigi 15 luna di prison di cual 5 luna ta condicional cu 2 anja di prueba. Tambe pa destrui e arma.
Hues a sera tratamento di e caso y a dicta sentencia di biaha. Hues ta haya legalmente proba cu W.M.V. tabatin un arma di candela. Pa cu e castigo, Hues a tene cuenta cu e maneho di Hof di Corte Superior cu ta duna castigo entre 21 y 24 luna di cual 6 luna ta condicional. Sinembargo Hues a sigui exigencia di Fiscal. El a condena W.M.V. na 15 luna di prison di cual 5 luna ta condicional y 2 anja di prueba. Hues a duna orden pa destrui e arma.