Estados Unidos a duna aprobacion completo pa uzo di e remedi antiviral remdesivir pa trata pacientenan di Covid-19 den hospital.
Food and Drug Administration (FDA) a bisa cu pruebanan clinico a demostra cu Veklury, e nomber commercial di e remedi, ta reduci e tempo di recuperacion cu mas o menos cinco dia.
“Veklury ta e prome tratamento pa Covid-19 cu a logra aprobacion di FDA” FDA a bisa.
World Health Organization (WHO) a bisa siman pasa cu remdesivir no tin mucho efecto ariba sobrevivencia di pacientenan di Covid-19.
WHO a bisa cu esaki ta basa ariba su propio estudio, pero e fabricante di e remedi aki, Gilead a rechaza e conclusion aki.
Remdesivir a wordo autorisa pa uzo di emergencia, solamente na Estados Unidos, desde e luna di mei 2020.
Na Estados Unidos e remedi aki lo costa 3,120 dollar via seguro priva y 2,340 dollar via gobierno pa compra di un kuur di 5 dia.
E remedi aki recientemente a wordo duna na Presidente Donald Trump despues cu el a test positivo pa Covid-19. Mientrastanto el a recupera.
Den su declararion, FDA a bisa cu e remedi a wordo aproba diahuebs pasa “pa uzo den adultonan y pacientenan pedriatrico di 12 aña pariba, cu un peso minimo di 40 kilo (mas o menos 88 liber) pa e tratamento di Covid-19 cu ta rekeri hospitalisacion”.
Segun FDA Commissioner Stephen Hahn, e aprobacion ta wordo sosteni door di informacion procedente di diferente pruebanan clinico cu e agencia a analisa rigorosamente y ta representa un meta scientifico importante den e pademia di Covid-19.
FDA a bisa cu su decision ta basa ariba analysis di data di tres prueba clinico controla, ariba patientenan hospitalisa cu symptomanan mediano pa severo di Covid-19.
Un di e estudionan a demostra cu e tempo averahe di recuperacion pa esnan cu a ricibi e tratamento di Veklury tawata 10 dia compara cu 15 dia pa esnan di e grupo cu a ricibi e placebo.
Pa su prueba clinico, WHO a test e effectonan di cuatro tratamento potencial, remdesivir tawata un di nan, pero tambe nan a investiga e remedi di malaria hydroxychloroquine, e remedi auto-immuno interferon, y e combinacion di remedinan di HIV lopinavir and ritonavir.
Dexamethasone, un steroid economico cu actualmente ta wordo uza den intensive care den Reino Unido, no a wordo inclui den e estudio.
E cuatro remedinan menciona, a wordo getest ariba un total di 11,266 paciente adulto den 500 hospital y den mas di 30 diferente pais.
Segun WHO e resultadonan, cu ainda mester wordo revisa door di mas experto, a sugeri cu ningun di e tratamentonan aki tawata tin un efecto substancial ariba mortalidad of e tempo cu e paciente ta permanece den hospital.