Home International Papa di Roma a declara di ta apoya union civil di parehanan...

Papa di Roma a declara di ta apoya union civil di parehanan di mesun sexo

SHARE

 

Papa Françisco a bisa cu e ta di opinion cu parehanan di mesun sexo mester wordo permiti pa drenta den “union civil”.

El a haci e comentarionan aki, cu observadornan ta bisa cu ta su remarcanan mas cla ariba relacionnan homosexual, den un documentario dirigi pa Afineevsky.

“Homosexualnan tin derecho di tin un famia,” el a bisa den e film, cu a haci su primicia Diaranson pasa.

“Nan ta yiunan di Dios y tin derecho pa tin un famia. Niun hende no mester wordo exclui of sinti malo pa esaki.

“Loual nos mester crea ta un ley di union civil. Asina legalmente nan ca cubri.”

El a agrega cu el a “para pa esey”, refiriendo aparentemente na e tempo cu e tawata Archobispo di Buenos Aires y, aunke el a opone contra legalizacion di matrimonio di mesun sexo, el a sostene algun proteccion legal pa parehanan di mesun sexo.

E film, Francesco, tocante e bida y trabou di Papa Françisco, a haci su primicia como parti di e Film Festival di Roma.

Banda di e comentarionan di e Papa ariba union civil, e film ta mustra tambe con e ta encurasha dos homber homosexual pa bai misa cu nan tres yiunan.

E biografo di Papa Françisco, Austen Ivereigh, a bisa BBC cu e ultimo comentarionan no ta sorprende.

“Esaki tawata su posicion como Archbispo di Buenos Aires,” Sr Ivereigh a bisa. “Semper e tawata contra matrimonio entre personanan di mesun sexo. Pero e tawata pensa cu misa mester boga pa un ley di union civil pa duna parehanan homosexual proteccion legal.”

Bou di doctrina Catolico vigente, relacionnan homosexual ta wordo cataloga como “desviacion den comportacion”.

Na 2003, e Congregacion di Vaticano, pa Doctrina di e Fe, a bisa cu “respet pa homosexualnan no por hiba di ningun manera na aprobacion di comportacion homosexual of na reconoce unionnan homosexual”.