Home Politics Prome Minister Evelyn Wever-Croes: Den un encuentro virtual: PREMIER WEVER-CROES...

Prome Minister Evelyn Wever-Croes: Den un encuentro virtual: PREMIER WEVER-CROES A PARTICIPA NA E ASAMBLEA GENERAL DI E ORGANIZATION OF AMERICAN STATES (OAS)

SHARE

Prome Minister Evelyn-Wever-Croes a participa na e Asamblea General di e Organization of American States (OAS) na unda e tawata tin e oportunidad pa elabora riba e retonan di Covid-19 y con Aruba ta atendiendo cu nan. Prome Minister tambe a toca e tema di e crisis di Venezuela y a haci un yamada na tur e paisnan cu ta miembro di OAS pa yuda Venezuela den e momentonan dificil aki ya cu e situacion a bira pio awor cu e crisis di Covid. Como bisiña di Venezuela, Aruba tambe ta sinti e efectonan di esaki. 

E region Caribense sigur tin retonan grandi nan dilanti a causa di e pandemia aki. E situacion economico y social a wordo afecta severamente na unda e casonan di desempleo a subi drasticamente afectando esnan mas vulnerable riba nos isla. 

Apesar di tur e aspectonan negativo cu e crisis aki a trece cu ne, tambe el a trece cosnan positivo. Como resultado, Aruba a bira un isla mas uni na unda nos hendenan ta mas solidario. Reino Hulandes tambe ta brindando ayudo proveyendo suplementonan medico pa yuda combati e crisis. 

Aruba como un isla cu su pilar economico mas grandi ta turismo, nunca por a biba pensa cu lo yega un dia cu lo mester stop tur e buelonan rond mundo pa Aruba. A base di e desaroyo di e casonan activo di Covid, ta habriendo e portanan bek poco poco pa nos bishitantenan. 

E derecho humano y democracia na mundo tambe a wordo poni bou presion door di e pandemia aki hibando nos pais na un lucha social creando instabilidad. Ta importante si pa enfatisa cu nos democracia y derecho humano no por wordo comprometi durante e lucha aki. 

Prome Minsiter a duna di conoce cu Reino Hulandes ta sigui mustra nan compromiso pa cu e esfuersonan haci pa OAS pa enforsa democracia dunando sosten na entre otro e mision di observacion electoral di OAS. Tambe nos ta reafirma nos sosten pa cu e trabounan di OAS en conexion cu e promocion di Derechonan Humano por medio di e Comision di Derecho Humano di Inter American cu enfoke riba esnan mas vulnerable. 

E situacion di Venezuela tambe tin Reino Hulandes sumamente preocupa y ta mira cu e unico solucion sostenibel ta pa bin un gobierno democratico via un eleccion husto. Un average di 5 miyon Venezolano a laga nan pais mirando cu e pandemia aki a haci e situacion mas dificil. E trabou di esnan encarga pa cu e migrante y refugiadonan di Venezeula ta un muestra di e contribucionnan valioso di OAS y cu Reino Hulandes ta apoya firmemente. 

“Apesar di tur e retonan, reino Hulandes ta keda positivo mirando cu un crisis ta hiba nos na innovacion y perspectivanan pa trece solucion. Pa por enfrenta e retonan aki ta rekeri innovacion, cooperacion global y partnership duradero. Pa construi miho ta rekeri accion transformativo. Reino Hulandes ta permanece un partner pa paz y stabilidad”, Prome Minister Evelyn Wever-Croes a duna di conoce.