E siman aki ta Siman di Reclassering. Awe nos kier para keto un rato na un di e proyectonan di Stichting Reclassering en Jeugdbescherming Aruba, esta e “Mentorenproject” . Den e proyecto aki e organisacion ta “match” mentor boluntario cu un hoben, pa asina aki por yuda e hoben logra e.o. su metanan di bida y laboral.
Mentorenproject tabata varios biaha den media e anja aki, mirando cu e la wordo nomina pa ricibi un prestigioso premio di “Appeltjes van Oranje” cu e anja aki a scohe pa premia organisacionnan cu ta hasi uso di boluntarionan pa trese personan den nos comunidad mas serca di otro apesar di nan diferencianan.
Na Juli ultimo Stichting Reclassering en Jeugdbescherming a start un campanja pa asina por haya mas mentor pa aplica na e proyecto. E campanja aki tabata uno sumamente exitoso mirando cu 27 persona a aplica. Stichting Reclassering en Jeugdbescherming Aruba kier bisa danki na cada persona cu a mustra interes y a aplica na e proyecto.
Debi na e situacion di COVID 19 cu nos ta aden actualmente, a pone cu e fundacion mester a hasi algun ahustacion y cambio interno pa e Mentorenproject por sigi. Mentornan existente a sigi mantene contacto cu hobennan via telefon of Whatsapp, pa asina limita contacto personal mientras e guia y sosten pa cu e hoben su trayecto ta sigi.
E mentornan aspirante lo mester a hasi un training y bay door di un procedura di seleccion, pero mirando e desaroyonan rond e “normal nobo” pa henter nos comunidad, Stichting Reclassering en Jeugdbescherming a haya su mes ta busca maneranan creativo y inovativo pa asina laga e grupo aki sera conoci cu e trabou di e organisacion y e Mentorenproject en general.
Pa cu esaki, Stichting Reclassering en Jeugdbescherming a organisa un concurso online den forma di un “quiz” usando e program Kahoot den cual tur participante a wordo reta (challenge) den nan conocimiento di kico nan sa caba di Reclassering. E quiz tabata consisti di 17 pregunta cu un time limit mara na dje. E participacion na e online quiz tabata uno sumamente positivo y pa e motibo aki, Stichting Reclassering en Jeugdbescherming sigur lo sigi haci uso di programanan digital/virtual y metodonan inovativo pa trece balance den desaroyonan digital y e trabow diario di e stichting.
E tres ganadornan di e Kahoot lo wordo anuncia durante di e siman aki. Pa tur desaroyo y noticia relata na e Siman di Reclassering por sigi e Facebook page di Stichting Reclassering Aruba.
Stichting Reclassering en Jeugdbescherming Aruba ta invita un y tur pa sintonisa e programa special “A True Role Model” diasabra awor, 24 di oktober pa 6:30 PM, via e Facebook page di Stichting Reclassering Aruba. Den e programa aki lo por scucha di ambos mentor y clientenan, con nan experencia cu e fundacion ta.