Oranjestad – Aruba; Desde aña 2018 Sociaal Crisis Plan (SCP) ta trahando hunto cu 20 diferente socio den sector social, hudicial, enseñansa y salubridad cu e meta pa fortifica e sistema nacional di proteccion di mucha y hoben aki na Aruba.
A haci entrega di e raportahe oficial na Parlamento pa asina duna informacion relaciona cu e ultimo desaroyonan y adelanto di cada proyecto den Social Crisis Plan. Den nomber di Minister di Asunto Social y Labor, sr. Glenbert Croes a haci entrega di raportahe na Parlamento di Aruba, Conseho di Minister u demas instancianan oficial.
Resultadonan di e raportahe ta indica cu 97% di e 31 proyectonan a conoce progreso. Tur proyecto cu ta activo ta traha pa yega un solo meta cu ta pa mehora e sistema di proteccion nacional pa nos muchanan y hoben.
E vision di Sociaal Crisis Plan ta pa sigui desaroya den un Plan Social Nacional Aruba (2021-2031). E base di e Plan Social Nacional ta keda e 7 “Inspire Strategies” internacional di Unicef, caminda ta boga pa sigui traha den e cuadro multi-sectoral den un angulo mas estrecho. E meta principal di e Plan Social Nacional ta pa soluciona structuralmente y eficientemente e problematica di violencia contra nos muchanan y hoben aki na Aruba.
Pa mas informacion tocante proyectonan di Sociaal Crisis Plan por tuma contacto cu 528-1100 \ 528-1189 of por manda nos un mensahe riba nos Facebook page @scparuba. Pa documentonan di Sociaal Crisis Plan, por bishita nos website www.scparuba.com.