Home Local Covid-19 tey y no lo bay pa awor: Nos no por fiesta...

Covid-19 tey y no lo bay pa awor: Nos no por fiesta y ignora aglomeracion, weekend a demostra otro

SHARE

Oranjestad – Durante fin di siman ariba caya por a mira algun establecimiento rand rand di hende. Prensa ta publicando con e cifranan di contagio a baha na un manera drastico.

E ultimo aki ta un super bon noticia, cu e maneho pa cu Covid-19 ta trahando.

Pero, nos mester ta cauteloso cu e publicacionan aki, debi cu algun hende ta bay interprete na un manera cu no mester ta. Mayoria ciudadano ta mantene nan mes na e protocolnan stipula pa e Crisis Team di Gobierno.

Esnan cu no ta worry mucho of cu ta pendiente di e cifranan publica y ta monitor e reducion drastico, kizas ta esnan cu ta subi caya y ta lubida ariba tur protocol di Covid-19.

Berdad cu e cantidad a baha, pero e virus tey y ta un realidad.Awe Johns Hopkins University a publica cu e contagio a suprasa 40 miyon caso di infeccion mundialmente. No por pensa cu si bo no tin 60 aña y no ta sufri di ningun enfermedad cu bo lo no por bira malo di Covid-19.

Mantene bo mes na e reglanan stipula, y evita aglomeracion. Esaki significa sea conciente y no bay unda tin un cantidad grandi di hende den un localidad cera.

Covid-19 no ta importa cu bo ta jong, kizas abo mes lo no bira malo pero bo sernan stima di edad si ta wordo contagia y te hasta por fayece. Varios Arubiano a perde nan bida a causa di Covid-19, unicamente no tur ta hende sa, sino solamente e famia.

Loke nos a mira weekend, ta un receta pa desaster y un otro ola di infeccion. E mesun publicacion cu ta sali tur dia, un grupo grandi ta tume como un motibo pa celebra y sali bebe.

Diadomingo anochi rond di 8’or, polis a bay ariba e parkeer plaats dilanti Talk of The Town, esta e parkinglot di Sandra’s Garden. Eynan tawata tin un multitud enorme, unda cu mester a manda varios patrouille yuda pa pidi e hendenan pa bandona e sitio. Loke nan a haci tambe, pero tawata pa solamente un rato.

Algun rato prome cu 10’or e lugar tawata yen di hende atrobe, no mesun hopi pero si yen. Si nos mes no mantene na e reglanan existente lo no dura mucho cu algo lo bay robes, y causa un subida grandi den contagio, cual lo resulta fatal pa algun.

Hulanda ta man na cabes, cu contagionan diario cu a surpasa 8 mil, y nan hospitalnan ta yen. Gobierno Hulandes a haye ta tuma medidanan drastico. Aruba no ta diferente, mantene bo mes leu for di sitionan unda tin aglomeracion. Eynan ta unda bo por wordo contagia facilmente.

Corda laba man, corda bisti bo mondkapje/tapaboca, y mantene distancia fisico for di otro. Esaki ta nos unico proteccion real contra e virus mortal aki.