Den mayoria pais desaroya, bo mester djis habri un cranchi pa bo tin acceso na awa limpi. Hendenan ta gasta varios galon di awa tur dia sin pensa, ora nan ta skeiro djente, baña of flush w.c.. Sin embargo, mas o menos 1.1 biyon di hende rond di mundo no tin acceso na awa limpi y safe pa bebe y pa un total di 2.7 biyon di hende ta hopi dificil pa haya acceso na awa pa un minimo di un luna pa aña.
Awa ta un ingrediente fundamental pa por sobrevivi, y nos curpa ta consisti pa mayoria parti, di awa. Ora nos haya nos forsa pa funciona sin awa, cos ta cuminsa bai robes.
Un averahe di 60 pa 70% di e curpa humano ta consisti di awa, e nivel exacto ta depende di nos edad. Nos curpa ta perde awa door di urina, soda, bai af y hala rosea. Pues, continuamente nos mester reemplasa e perdida aki door di come y bebe. Mas o menos un tercera parti di e awa cu nos ta haya paden, ta bin di cuminda y bebida. Si nos no haci esaki, nos curpa lo por deshidrata.
E prome fase di deshidratacion ta bin ora cu nos perde un cantidad di awa ekivalente na 2% di nos peso corporal. “Ora bo haya sed, bo curpa ta wanta e awa cu ainda tin den dje.” segun Dileep Lobo, profesor di cirugia gastrointestinal, kende ta investiga e balance entre likido y electrolytes. “Bo nier ta manda menos awa pa bo blaas, locual ta haci cu bo urina ta bira un color mas scur. Mientras menos bo ta soda, bo temperatura di curpa ta subi. Bo sanger ta bira mas diki y mas slow. Pa mantene e nivel di oxigeno necesario, bo pulso ta aumenta.”
E nivel ariba cual deshidratacion ta tuma lugar ta varia, segun e presion cu wordo poni ariba e curpa. Por ehempel, si bo no tin acceso na awa den un clima di 50C (122F), mientras bo ta bezig cu ehercisio extremo, deshidratacion por bira mortal hopi lihe. E ser humano tin un limite ora ta trata di soporta calor. Asina cu esaki wordo surpasa, nos curpa ta bai den stress, y esaki por bira mortal.
Ora haci ehercisio den calor, e curpa humano por perde entre 1.5 pa 3 liter di awa cada ora, door di soda. Otro 500ml por wordo perdi door di hala rosea, dependiendo di e humedad di e aire.
E efecto cu esaki tin ariba e curpa humano ta profundo. Asta deshidratacion medio, por laga nos sinti mas cansa y menos apto pa funciona fisicamente. Mientras mas nos perde awa, nos abilidad pa e curpa fria door di soda tambe ta bira menos, cual ta aumenta e risico di overheat. Nos sanger ta cuminsa bira diki y mas concentra, locual ta nifica cu nos sistema cardiovascular mester bai traha mas duro pa mantene e presion di sanger.
Nos niernan ta purba compensa y retene mas awa door di reduci nos urina. Awa ta bai sali tambe for di nos celnan y drenta den nos sanger, cu e consecuencia cu nos celnan ta reduci den tamaño. Na momento cu nos perde 4% di nos peso den forma di awa, nos presion ta baha y nos por cai flauw.
E di tres fase, ora cu 7% di e peso corporal bai perdi, ta daño na organonan. Door cu bo curpa ta den problema pa mantene presion di sanger, e ta bai slow down e circulacion pa e organonan no-vital manera bo niernan y bo stoma, causando daño na esakinan. Basicamente bo ta muriendo pa un glas di awa. Sin un cantidad adecua di awa pasando door di e niernan, toxinanan corporal ta cuminsa build up, hacienda cu e niernan ta stop di funciona corectamente. Esaki por conduci na un forma di daño na nier, conoci como tubular necrosis, cual, asta si na cierto momento logra rehidrata e curpa, por dura simannan pa recupera di dje.
Den un adulto sano, urina ta consisti pa 95% di awa y e resto ta desperdicio saca door di e niernan, incluyendo salo y amoniak. Ora un hende ta deshidrata, e nivel di awa den su urina ta reduci di tal manera cu e urina ta bira manera awa di lama. Urinacion ta reduci y na cierto momento esaki por conduci na un anuria, fayo den produccion di urina.
Mientras deshitratacion ta empeora, e por afecta e funcion di nos cerebro, cambia nos beis y nos abilidad pa pensa claramente. Cu uzo di salo rehidratante, sin un bon cantidad di awa disponibel, bo lo por yuda reemplaza salo y sucu, pero bo lo riska di causa mas desbalanse den e curpa. Den casonan extremo, un desbalanse den e nivel di salo por conduci na un ataca of hersenbloeding.
Deshidratacion por causa tambe cu partinan vital di e sistema cardiovascular, manera e adernan, ta bira duro, locual ta aumenta e risico pa un ataca di curason. E extra presion ariba bo curason lo conduci tambe na pulso irregular, caida den presion di sanger y posibel ataca, coma y na momento cu organonan faya, asta morto.
Exactamente con largo un hende lo por sobrevivi sin awa ta wordo debati. Mayoria scientifico ta di acuerdo, cu e ser humano lo por soporta solamente un paar di dia sin cuminda of awa.
E abilidad di funciona sin awa ta varia hopi di persona pa persona. Ta existi evidencia e curpa humano por adapta na e nivel di awa cu un persona ta bebe regularmente.
E caso mas excepcional, na unda un persona a yega di soporta 18 dia sin awa, tawata e caso di Andreas Mihavecz, un Austriaco di 18 aña cu a wordo lubida den un cel di polis pa 18 dia na aña 1979. Su caso a aparece den Guinness Book of World Records.
Fuente: BBC