Home Local Stichting Reclassering en Jeugdbescherming Aruba ta organisa su anual “Siman di Reclassering”

Stichting Reclassering en Jeugdbescherming Aruba ta organisa su anual “Siman di Reclassering”

SHARE

 

 

Stichting Reclassering en Jeugdbescherming Aruba ta organisa su anual Siman di Reclassering di 19 – 24 di oktober 2020 pa duna informacion di e trabow y proyectonan cu e fundacion ta eherce den nos comunidad. 

Durante di e siman aki, Stichting Reclassering en Jeugdbescherming ta organisa diferente actividad manera un Quiz Kahoot pa e mentornan boluntario di e fundacion, un challenge bou di hobennan pa traha e jingle nobo di Reclassering y e siman lo sera cu un programa special, “A True Role Model”, Live for di e Facebook page di Stichting Reclassering Aruba riba diasabra 24 di oktober pa 6:30 pm. 

E meta principal di e Siman di Reclassering ta, pa comunidad sera conoci cu e trabow di e organisacion, den cual ta traha cu hoben y adultonan cu a haya nan mes den problema cu husticia y ta core e riesgo pa sigi den mal caminda. Stichting Reclassering en Jeugdbescherming ta haya importante pa comunidad ta na altura di nan actividadnan, pa asina por compronde y sostene e esfuerzonan cu ta wordo haci pa combati y preveni crimen pa medio di resocializacion y reintegracion di hoben y adulto cu a comete un delito. 

Un di e proyectonan di Stichting Reclassering en Jeugdbescherming, ta e “Mentorenproject ”. Den e proyecto aki ta “match” hobennan cu mentornan voluntario, pa ricibi guia, bow reglanan estricto, pa yuda nan stabilisa y bira independiente. Ta brinda e hobennan “tools” pa haci mihor escogencianan pa cu un futuro positivo. E fundacion ta traha hunto cu boluntarionan den nos comunidad pa yuda sostene y coach e hobennan durante nan trayecto. 

Banda di guia individual y guia den grupo, Stichting Reclassering en Jeugdbescherming ta ocupa su mes tambe cu otro proyectonan manera e Proyecto “Conectando”. Den e proyecto aki ta pone enfasis pa conecta e hoben adulto bek cu e mercado laboral. E proyecto ta brinda hoben entre 16 – 25 aña di edad, cu no a caba educacion secundario y cu no ta trahando, e oportunidad pa drenta un trayecto di trabou den cual ta ricibi guia. Na final di e trayecto, cu por dura entre tres pa seis luna, e hoben ta haya un experiencia di trabou y ta traha riba e habilidadnan social pa mantene un trabou. 

Di e formanan aki, entre otro, Stichting Reclassering ta trata na stabilisa y re-enforza tanto adulto como hoben den nos comunidad, pa asina nan por hiba un bida stabil y sin problema. Experiencia ta, cu bou di mayoria di e clientenan cu a sigi y a caba un di e programanan di Stichting Reclassering en Jeugdbescherming, ta mira un cambio di comportacion positivo y casonan di re-incidencia sa baha. 

Keda na altura di e actividadnan di Stichting Reclassering en Jeugdbescherming durante Siman di Reclassering pa medio di e Facebook page di Stichting Reclassering Aruba. 

Stichting Reclassering en Jeugdbescherming ta invita pueblo di Aruba pa sintonisa e programa special “A True Role Model”, diasabra awor 24 di oktober pa 6:30 pm via e Facebook page di Stichting Reclassering Aruba pa sinja mas di e fundacion, kico e ta tuma pa bira un mentor y con pa participa na e jingle challenge.