Home Police Kia Cerato a ranca palo di luz dialuna marduga

Kia Cerato a ranca palo di luz dialuna marduga

SHARE

Paradera/Sero Patrishi – Dialuna marduga algo pasa di 1’or habitantenan di un parti di Paradera a hayanan diripiente sin coriente.

E momento ey no tawata sa kiko a pasa.

Polis di Playa durante su patruya a bin topa ariba e caminda di Sero Patrishi pa Paradera un Kia Cerato color cora hinca den mondi pazuid di caminda.

E chauffeur lo a bandona e sitio algun rato prome cu polis a yega.

Momento cu polisnan a bay mira pa e documentonan den e auto no a haya esakinan, un indicacion cu e chauffeur a pasa man pa tur cos, pero a lubida e plachinan di number.

Di e manera aki polisnan por a haya sa unda e ta biba, y a resulta cu ta un adres den Sero Blanco. Polis ta pensa e por a cana bay, y no sa si e por ta herida.

Polis a pidi pa takelwagen y esaki den algun minuut a yega y a bay cu e auto pa un warda di polis.

Elmar a wordo poni na altura, y mesora esnan cu tin piket a presenta y a saca algun potret pa geef door na esnan cu mester bin lanta e palo di luz.

Despues di algun rato mesora Elmar a pone e coriente bek pa e habitantenan, pero pa loke ta trata e trabou esaki lo dura basta ora pa pone un otro palo di luz.

Pues e chauffeur di e Kia Cerato tin un debe awor basta bon cu Elmar.