Oranjestad, Aruba: Diabierna dia 16 di October tabata net 1 aña cu Hyatt Place Aruba Airport a habri su porta nan pa comunidad local y internacional.
Den e prome aña aki Hyatt Place Aruba Airport a ricibi un tremendo acogida entre nos localnan, bishitantenan internacional y tambe e mundo corporativo.
Banda di nan tarifanan sumamente atractivo, e hotel a sa di ofrece promocion nan atractivo pa e huespednan por goza di nan cambernan espacioso cu diseño moderno y bistanan diferente y tambe espacionan di reunion y eventonan, sin laga afor e gastronomia cu platonan caribense cu ta un di e razon nan cu nos local nan ta regresa.
A pesar e situacion actual, Hyatt Place Aruba Airport a sa di celebra den un manera sencillo y creativo.
A cuminsa for di 1 di October, cu “teasers” y rifanan, unda un y tur por a participa.
Ariba dia 9 di October e ganador di e campaña di Facebook a ricibi e one night stay na Hyatt Place Aruba Airport pa keda riba 16 di October y celebra cu e fabuloso team di Hyatt Place Aruba Airport.
A otorga varios otro premionan, manera entre otro un daypass pa disfruta di nos roof top pool area.
Den lobby, cu un decorashon unico di blaas, por a admira un bolo tipo cupcake gigante cual gerencia y staff di Hyatt Place Aruba Airport a sa di orguyosamente cuminsa e celebracion, cual a finaliza cu un lunch pa e staff y personal den nan elegante ballroom.
“Nos kier a duna un danki di curazon na cada un di nos miembronan di nos staff y personal pa a sa di mantene nan entusiasmo y dedicacion pa ofrece e servicio unico cu Hyatt Place Aruba Airport so por brinda, durante nos prome aña. Un agradecimiento special tambe na nos comunidad local pa tur e apoyo incondicional cu nan a sa di brinda nos desde nos apertura” segun Marta Raven, General Manager di Hyatt Place Aruba Airport.
Ariba e dia special aki tambe, Hyatt Place Aruba Airport, a inaugura nan menu nobo, cual ta wordo crea, “off the grill” banda di e pool. Un combinashon di aroma di e diferente platonan cuidadosamente elabora cu un estilo caribense, ta sali “steaming hot” for di e grill. Esaki sigur ta un experiencia diferente, cual tur hende por disfruta un “roof top experience” y por admira e chefnan preparando platonan unico. Chef Jeffrey Vrolijk, a sa di splica tur presente, e storia tras di cada plato.
“ Mi kier a probecha pa invita un y tur pasa y sera conoci cu nos menu nobo, y sigui disfruta di e servicio amabel y simpel cu nos Rubianonan sa di ofrece.” Marta Raven a agrega.