Diahuebs cu a pasa nos a trata den un reunion publico e porblematica di tiramento di pisca na Aruba. Den e reunion aki tres Minister di Gabinete Evelyn Wever-Croea mester a bin duna cuenta na parlamento di Aruba cu unanimamente a pasa un mocion dia 1 di oktober 2020 unda ta instrui e gobernantenan pa caba e proceso cu tin añas ta bayendo y awo den Covid a mira e necesidad mas urgente ainda
Reunion Publico
Manera reunion a habri Minister Andin Bikker a presenta na parlamento un lista di 10 punto di accion cu Ministerraad a aproba pa por termina e proceso di tiramento di pisca. Akinan e factor mas importante ta cu pa por aplica un gedoogbeleid, esaki mester ta basa cu tin un bista claro cu lo bin un landsbesluit houdende algemene maatregels (lb ham). Una bes cu esaki ta cla e gedoogbeleid lo termina y nos lo papia di vergunning basa riba e landsbesluit ham aki.
Parlamento a sinti cu nada lo ser concretisa
Dos Minister esta Minister Andin Bikker y Minister Chris Romero a cumpli cabalmente cu e mocion di parlamento pero tambe ta ehecutando caba e desicion di Ministerraad pa por termina e proceso di tiramento di pisca na un forma bon regula. Pero Minister di Infrastructura y Medio Ambiente Marisol Lopez-Tromp a laga haci un biaha mas riba desicion di Ministerraad un ronda di conseho fasttrack y unda kier mira cambio entre otro pa por tira pisca na distancia di 2 km di costa, pa e tirador humilde bay inscirbi su mes na kamer van koophandel pa e por bay aplica pa vergunning cu Minister Andin Bikker ni Minister Romero ta comparti y sigur nos di parlamento ni e piscado humilde no por comparti ni compronde. Y cu esaki ta mas cu claro cu e landsbesluit cu mester tres firma hamas lo ser ehecuta y cu consecuencia cu no por aplica e gedoogbeleid paso no tin bista cu lo bin un landsbesluit ham.
Mocion di desconfiansa
Ayera democracia por fin a funciona ora cu parlamentarionan di mesun gobierno a dicidi cu ta basta cu nan mesun minister y laga esaki ta e mensahe tambe pa otro ministernan cu cos a cambia y sigur mocionan di parlamento mester ser respeta. Y sigur locual a resalta ta cu e Minister di Infrastructura Marisol Lopez -Tromp no lo scoge pa ta banda di e piscadonan y hamas lo firma e landsbesluit y den bista cu esaki hamas por yega na un solucion no a keda nada otro pa entrega un mocion di desconfiansa pa motibo cu no tin confiansa mas den dje y esaki den un reunion cu 18 miembro di parlamento presente unda cu 8 miembro a abstene di vota a sali di sala despues cu esakinan a duna nan stemmotivering den e proceso di votacion.
Ta lamenta cu partido RED cu a grita cu voz fuerte y partido AVP cu a firma e mocion pa obliga gobierno pa yega na un solucion pa e piscadonan a sali y laga e piscadonan na caya. Pero nos cu ta para pa cada cuidadano a vota pa kita confiansa den e Minister di Infrastructura y Medio Ambiente p’asina por ehecuta e plan aproba den Ministerraad pa e piscadornan y cu si tur cos cana segun planificacion pa otro siman por cuminsa e proceso di registracion y mientras e landsbesluit lo cana su camida.