DEN HAAG – Mientras e gabinete Hulandes ta urgi ciudadanonan pa keda cas mas hopi posibel, e avion di famia real a sali diabierna merdia pa Grecia, na unda Rey Willem Alexander tin su residencia vacacional.
Vice-premier De Jonge a bisa ministerraad di no ta na altura di e plannan di vacacion di e rey. Tambe e vocero di Rijksvoorlichtingsdienst (RVD) a bisa di no sa si e rey ta bai cu vakantie.
RVD no kier laga nada los over di vakantie di e famia real, pasobra esaki ta pertenece na e privacidad di e famia. RVD a laga sa mas laat durante dia, cu e rey y reina ta tene nan mes na e reglanan pa cu biahe y pa cu coronavirus.
’Geel gebied’
Fuentenan a informa cu e rey ta biahando pa un area delinea como ’geel gebied’. E residencia vacacional di e rey ta situa ariba tera firme Griego, dentro di e asina yama ’geel gebied’. E islanan Griego a wordo declara como ’oranje gebied’, locual ta nifica cu Hulandesnan ta wordo sugeri pa bishita nan solamente den casonan necesario. Un salida cu e speedboot real den direccion di un di e islanan Griego no ta un opcion, si e rey y su famia kier evita diez dia di cuarentena. Esaki ta un exigencia den caso di un bishita na un ‘oranje gebied’ segun e gabinete Hulandes.
E viahe di e rey pa exterior ta bin na un momento pikante, pasobra e gabinete ta pushando pa reduci biahamento te na un minimo. Minister Grapperhaus (di Husticia) ta conseha hendenan pa por lo pronto no cruza e frontera den direccion di Belgica. De Jonge ta conseha hendenan cu kier tene vakantie na Hulanda mes, pa keda lo mas hopi posibel den vecindario di nan propio acomodacion.
‘Imprudente’
Tambe den Tweede Kamer ta reina e opinion cu vakantie den exterior na e momentonan aki ta imprudente, mirando cu e di dos ola ta conecta na e vakantie cu hopi Hulandes a pasa den temporada di verano den area Mediterraneo. Di eynan hopi hende a regresa contagia cu coronavirus.
E vakantie reciente di e rey y e reina na Grecia den temporada di verano a conduci caba na incertidumbre algun luna pasa, ora cu for di un portret a bin resulta cu e rey y reina Máxima no a mantene nan mes na e regla di distanciamento social. Despues di e critica, e pareha a laga sa cu tawata un momento espontaneo durante cual nan no a mantene nan mes na e distancia reglamentario. „Claro cu nos mester a haci esaki. Pasobra asta durante vakantie, ta esencial pa mantene bo na e reglanan pa logra domina e virus.”
„Imprudente y incomprendibel”, miembro di D66 Joost Sneller a considera e vakantie di e rey. Tambe miembro di SP Ronald van Raak a considera esaki como algo ’hopi lamentable’: „E rey ta fungi como ehempel y lo mester por tin un mihor gevoel den e situacion actual.”
Fuente: De Telegraaf