Rey Philippe di Belgica finalmente a topa cu su medio-ruman – antes secreto – Delphine de Saxe-Cobourg, despues di añas cu e paternidad di e prinses a wordo nenga door di e Monarkia Belga.
October 9 2020 ta e fecha ariba cual nan a topa pa prome biaha, na e kasteel di Laeken, e residencia official di e famia real. E encuentro a wordo describi door di e Monarkia Belga como uno “calido”.
Saxe-Cobourg ta e yiu muher di e rey anterior, Albert II, y na comienzo di e luna di oktober ela gana e derecho di yama sumes Prinses, a base di un decision di e Corte di Apelacion di Bruselas, cu ta bisa cu e tin e derecho ariba e mesun privilegionan y titulonan real cu e tres otro yiunan di su tata.
Delphine Boël, manera antes yama, a cuminsa un proceso legal na aña 2013 pa obliga e rey anterior Albert II, di reconoce como su tata. Ela alega, cu e ex-rey a mantene un relacion extramarital scondi cu su mama Sibylle de Selys Longchamps, cual a resulta den su nacemento na aña 1968.
E rey anterior pa varios aña a desmenti esaki y asta a nenga di cumpli cu e orden di e Corte di Apelacion di Bruselas di october 2018, pa entrega un prueba di paternidad.
Finalmente Albert II a haci un prueba di paternidad despues cu e Corte di Apelacion di Bruselas a oblige haci esaki imponiendo un multa di € 5,000 pa cada dia cu e no cumpli cu e decision pa haci e test. Na januari 2020 finalmente ela acepta cu e ta tata biologico di Boël.
“E discusion largo y intenso aki a duna nos e oportunidad di siña conoce otro. Nos a papia tocante nos bidanan y nos areanan di interes mutuo”, Rey Philippe y Prinses Delphine a bisa den un comunicado diahuebs pasa. “E lasonan aki lo sigui desaroya den seno familiar,” nan a agrega.
Na aña 1959 Prins Albert di Belgica a casa cu Paola Ruffo di Calabria, kende na momento di coronacion di su casa como Rey Albert II na 1993 a bira Reina Paola di Belgica. Na aña 2013, cu 79 aña di edad, Albert II pasa e trono pa su yiu Philippe, pa motibo di edad y salud.
Fuente: CNN