Home » International: Fin di november e farmaceuta gigante Pfizer lo aplica pa aprobacion federal di emergencia di su vacuna contra coronavirus

International: Fin di november e farmaceuta gigante Pfizer lo aplica pa aprobacion federal di emergencia di su vacuna contra coronavirus

by Admin
0 comment 49 views

E CEO di Pfizer, Albert Bourla a bisa den un carta habri, cu pa fin di november 2020 su compania lo por aplica pa aprobacion federal di emergencia di su vacuna contra coronavirus. Na e momento ey, e compania farmaceutico ta spera di tin suficiente data tocante e safety y eficacia di e tratamento. Esaki ta prome biaha cu un compania cu ta desaroya vacuna a specifica ki ora un vacuna lo por bira disponibel.

Asumiendo cu e data ta positivo, Pfizer lo aplica pa e asina yama “Autorizacion pa Uzo di Emergencia” pa cu e vacuna na Estados Unidos, inmediatamente despues cu e meta cu ta regarda safety a wordo cumpli, esaki lo sosode den e tercer siman di november. Asina Bourla a menciona den su carta. Food and Drug Administration ta encarga cu e revision y aprobacion di peticionnan pa uzo di emergencia.

Ela agrega cu tur e data conteni den e aplicacion pa uzo na Estados Unidos, lo wordo revisa, no solamente door di FDA su propio scientificonan, pero tambe door di un panel externo di expertonan independiente den un meeting publico cu lo wordo yama door di e agencia.

37 estado Mericano ta mirando un subida den e averahe di casonan nobo di coronavirus. Solamente den un estado, cu ta South Carolina, e cantidad ta relativamente abou. 

Na mesun momento, 2 desaroyado di vacuna a stop nan pruebanan pa motibo di preocupacion pa cu e safety di e vacuna, Eli Lilly a stop testnan humano y Johnson & Johnson a stop su testnan e siman aki pa motibo cu un participante a bira malo. 

Pfizer’s su anuncio cu e lo por aplica pa uzo di emergencia na final di november ta un mal noticia pa Presidente Trump, kende practicamente a sigura cu un vacuna lo por ta cla pa dia di eleccion, cu ta 3 di november.

“Tin hopi confusion tocante exactamente kiko lo ta necesario pa sigura e desaroyo y aprobacion.” Bourla a bisa den su carta. 

Segun Bourla, Pfizer, cu ta desaroyando e vacuna hunto cu BioNTech, mester demostra cu e tratamento ta efectivo pa preveni COVID-19 den por lo menos e mayoria di esnan cu a wordo vacuna. Siguientemente, e mester proba cu e vacuna ta safe. Y por ultimo, e compania mester demostra cu e por produci e vacuna consistentemente, ariba e nivel mas halto di calidad. 

Mas tempran den 2020, Pfizer a firma un acuerdo di $1.9 biyon, pa suministra e gobierno Estado Unidense cu 100 miyon di dosis di un vacuna contra COVID-19. Mericanonan lo ricibi e vacuna gratis, e compania farmaceutico a bisa. E deal aki ta inclui e derecho pa cumpra un cantidad adicional di 500 miyon di dosis.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio