Home Corte 8 aña di prison exigi pa homber cu a herida tres persona...

8 aña di prison exigi pa homber cu a herida tres persona cu shotgun

SHARE

ORANJESTAD – Corte den Promer Instancia via video conference a trata e caso penal cu Ministerio Publico a cuminsa contra e homber R.C. E ta wordo acusa di intento di mata, intento di causa heridanan severo y posecion di un arma di candela riba 21 December 2019.

Aruba Native por a compronde cu a scucha un miembro di Recherche den Corte, kende tambe ta un experto di arma. Esaki pa determina si R.C. a tira dirigi riba e grupo di persona caminda tres a resulta herida. Tambe pa haya sa si e shotgun fabrica door di R.C. mes por causa morto.

E miembro di Recherche a splica cu a base di e heridanan riba e dama W., kende tabatin balanan den su zij y bariga, e mester a conclui cu ta un bala di cartuchi. Esaki pasobra no a haya e arma.

Hues a bisa cu 21 December 2019 e tiramento a tuma lugar. Despues e miembro di Recherche por a bay y Fiscal a puntra R.C. pakico el a mustra e hendenan den e bar e arma. El a bisa cu e ta hopi pasivo y tabata sinti su mes amenaza door di e hendenan den bar.

Ta asina cu e dama W. a haci un demanda di 50 mil florin mientras cu e otro dos hombernan no a haci demanda di daño.

Fiscal a bisa cu R.C. mes a admiti cu riba un distancia di 3 meter el a tira riba suela den direccion di un grupo. Fiscal a mustra cu un dama a resulta herida door di e tiro y ta conclui cu R.C. no a tira riba suela. Na opinion di Fiscal, tabatin un discusion y pelea y pafor di e bar R.C. a tira dirigi riba e grupo caminda e dama W. y otro dos homber a resultado herida.

Fiscal ta haya cu intencionalmente y cu rabia R.C. a tira riba W. cu e chens cu W. por a muri.   Fiscal a bisa cu e no ta kere cu por papia aki di defensa propio. R.C. tabatin e arma cun’e ora el a drenta den e bar y a mustra e arma na esnan den e bar. Ora di e problema, el a saca e arma y a tira. Pa loke ta demanda di daño, Fiscal ta haya esaki ta mucho halto y ta haya cu 15 mil florin lo ta na su lugar. El a pidi pa declara e resto no admisibel pa asina e victima lo por cuminsa un caso civil.

Pa e castigo, Fiscal a bisa cu e ta tene cuenta cu R.C. ta “first offender” pero ta un caso hopi serio. Tres persona a resulta herida. Fiscal a exigi 8 aña di prison.

Abogado mr. Illes a bisa Hues cu e ta haya cu R.C. a haci uso di defensa propio. El a mustra cu R.C. na 2018 a bira victima di tiro y ainda tin bala den su curpa. Ta e grupo a busca problema den e bar y bringa cun’e. R.C. a core bay y 50 meter leu ainda e grupo ta su tras. Na opinion di e abogado, esaki ta haci cu R.C. a dicidi di defende su mes y a los un tiro so. E ta haya cu esaki, a base di ley, ta crea un situacion cu R.C. por a defende su mes. E abogado a pidi pa declara R.C. no castigabel. E ta haya e castigo exigi pa Fiscal demasiado halto y tambe e demanda di daño. Hues a bisa cu otro luna, 4 November 2020 lo tin sentencia.