Home Local Dama Arubiano a atende debidamente cu algun turista, na Kapel di Alto...

Dama Arubiano a atende debidamente cu algun turista, na Kapel di Alto Vista

SHARE

Maske tin un borchi na e entrada di e cura di Alto Vista cu mester bisti apropia pa drenta den kapel, asina mes nos por mira hopi biaha cu turistanan no ta respeta y ta drenta den e kapel hopi scars bisti, den zwempak y badbroek, cu sigur ta algo cu hopi sin respet.

Por ta e turistanan aki ta pensa cu na Aruba nos ta acepta tur cos di nos bishitantenan paso nos ta biba di turismo.
Dialuna den oranan di merdia, algun turista a kere cu nan por a drenta cu badpak bisti den Kapel y pa colmo cu botter di cerbes den man, nan a haya un bon para di un dama Arubiano cu a drenta nan tras.

E dama tabata basta rabia y mesora a dirigi su mes na e turistanan, bisando nan cu esaki ta un luga sagrado, e ta un misa y cu tin un borchi eyfo cu ta bisa cu mester bisti apropia pa drenta den e kapel. E turistanan a mira con rabia e dama local tabata, mesora nan bis’e hopi sorry y nan a sali di biaha for di Kapel.

Niun parti di mundo y den niun misa di niun religion, no ta permiti pa un persona drenta den badpak, tin pais te hasta cu bo por wordo deteni pa esaki. Cada ken cu nan religion of creyencia y cada ken mester respeta religion y creyencia di otro tambe.

Pa e religion Catolico y e pueblo Arubano Kapel di Alto Vista ta un lugar hopi sagrado, y tin un significado grandi, paso ta aki ta unda Cristianismo a wordo introduci na Aruba den siglo 18. Na 1750 e prome Kapel na Alto Vista a wordo construi y ta aki ta unda e indiannan cu tabata biba na Aruba a conberti den Cristian.

Por ta e borchi ta mucho abou poni cu nan no a pone tino cu tin un borchi, of nan a haci mane nan no sa, pero cualke hende por pensa cu drenta un misa bo no por drenta den badpak y cu cerbes den man.


Turista cu botter di cerbes den man saliendo di Kapel

Por ta mester pone un borchi mas visibel na e entrada di e Kapel mes, cu ta prohibi pa drenta cu badpak bisti, short cortico, etc.. Lo ta bon pa haci esaki prome cu nos bolbe haya un ripiticion di algun luna pasa di Betty Foxx.

E kapel ta un stop faborito di hopi tours, entre otro Jeep, Bus of UTV tours tur ta pasa haci un stop na Kapel, lo ta bon pa sugeri tourguidenan pidi e turistanan pa si nan kier drenta den e kapel pa nan bisti un blusa, tshirt, short etc prome cu drenta paden. Evitando pa nan no topa un biaha mas cu un Arubiano rabia y por papia malo cu nan.

Ban cuida y respeta nos Kapel di Alto Vista